Sorkar kum liam ta 2018-2019 chhungin Transport deptt.-in chhiah vbc. 44.37 an hmu
Sorkar kum liam ta 2018-19 chhung khan Transport department-in chhiah chi hrang hrang cheng vbc. 44.37 an hmu a, kum kal mekah April 2019 khan chhiah aṭangin cheng nuai 368.7 an hmu tawh. Transport department hotute chuan, Mizorama lirthei nei zingah chhiah pe ṭha tâwk lo an awm tih sawiin, chhiah pêk chu lirthei neitute tih tur a ni tih mi tinin hria se an duh thu an sawi.
Transport department hotute'n Vanglaini palai an hrilh danin, Transport hian chhiah chi riat (8) a la a, chu'ng chhiah chi riat aṭang chuan kum 2018-19 chhung khan Rs. 44,37,03,882 an hmu. Sorkar kum kal mek, 2019-20 ah thla khat chhung (April) ringawtin chhiah Rs. 3,68,73,151 an hmu tawh.
Lirthei chhiah (taxes on vehicles) hnuaiah, chhiah mala sum an hmuh tamna ber chu State Motor Vehicle Tax Act (SMVTA) a ni a, passenger phur leh bungraw phur (sumdawnna) lirtheite aṭanga lak a ni; SMVTA hnuaiah hian kum 2018-19 chhung khan Rs. 23,96,35,296 an hmu. Indian Motor Vehicle Act (IMVA) hnuaiah Rs. 9,69,20,208 an hmu a, hei hi India ram puma hman tur chhiah lâk theihna a ni.
Taxes on Vehicles hnuaia dah tho, 'others receipt' tih a awm a, chu chu chhiah pêk tlâi te, lirthei man aṭanga chawitir (compounding)-te leh lirthei khalh dik loh vanga chawitirte aṭanga lak a ni a; chu'ng aṭang chuan Rs. 4,22,10,933 hmuh a ni. Taxes on vehicles hnuaia an hmuh zawng zawng chu Rs. 37,87,66,437 a tling.
Passenger and Goods Tax bikah chhiah chi thum awm mah se, chu'ng zinga pakhat 'Tolls on roads' chu Mizoramah kalpui a la ni lo. Goods tax aṭangin kum 2018-19 chhung khan Rs. 3,37,39,590 hmuh a ni a, Passenger tax-ah Rs. 98,32,207 hmuh a ni. Passenger & Goods Tax hnuaia chhiah hmuh zawng zawng chu Rs. 4,35,71,797 a ni.
Road Transport tia dah, Mizoram State Transport (MST) bus bik aṭangin revenue Rs. 2,12,70,022 an hmu a; loan interest aṭangin Rs. 82,896 (department hnuaia thawktute'n loan an lâk aṭanga dahkham an neih aṭanga an hmuh) leh, housing (license fee) aṭangin Rs. 12,730 an hmu bawk.
Sorkar kum kal lai, 2019-20 chhunga thla khatna, April thla bikah Transport department chuan chhiah chi hrang pariat aṭangin Rs. 3,68,73,151 an hmu tawh. Tax on vehicles hnuaia SMVTA aṭangin Rs. 2,05,24,874 leh IMVA aṭangin Rs. 70,42,071 an hmu a; Passenger & Goods Tax hnuaiah Rs. 41,45,101, MST bus aṭangin Rs. 14,07,764, loan interest aṭangin Rs. 7,536 leh housing (license fee) aṭangin Rs 1,500 an hmu bawk a ni.
Lirthei neitu tam takin chhiah an pek ṭhat tâwk loh avangin harsatna an tâwk tih sawiin Transport department hotute chuan, "Ministry of Road Transport and Highways (MoRTH)-in India ram puma hman tur a tih angin Vahan leh Sarathi hmangin lirthei registration leh license reng reng computerise vek a ni tawh a, AG office pawhin IT hmangin min audit ṭhin. Sorkara chhiah kan chhûn luh a tam tâwk lo a, inthlahdah min ti ṭhin. Hei hi lirthei neitute'n chhiah an pek
ṭhat tâwk loh vang a ni," an ti.
Transport department hotute chuan, thawktu an indaih loh avangin a nih tur ang taka kal a harsa tih sawiin, "Lirthei neitu reng rengin chhiah pek tur a ni tih hi hria se kan duh tak zet a ni," an ti a; kum 2018-19 chhunga chhiah an hmuh chu a hma kumte aia a tam thu leh, chu chu lirthei a pun vang leh dan bawhchhia chawitir a pun vang a nih thu an sawi.