Hmun hrang hrangah Chapchar Kût hmang

Mizoram hmun hrang hrangah nimin khan Chapchar Kût hman a ni a, district khawpui tinah hman a nih bakah, khaw dang eng emaw zatah hman a ni. Kûtah hian hnam làm leh zai chi hrang hrang entir a ni hlawm a; hmun ṭhenkhat­ah chuan minister, MLA leh district bawrhsapte'n an hmanpui.

Lungleiah chuan Ṭhuamluaia Mualah Chapchar Kût hman a ni a, additional DC R Vanrengpuia chu kût thlengtu niin, Lunglei HPC vice chairman Lawmawma Tochhawng, MLA chu kût pa a ni.

Chapchar Kûtah hian malzai, zaipawl, rimawi tum leh hnam lâm chi hrang hrang - párlàm, sárlàmkai, sing sing tang làm, chheihlam, chai, cheraw leh Mara Thyutlia Py (MTP) headquarters, Siaha aṭangin hnam làm entir a ni. Lunglei district MJA-in Chapchar Kut Miss an thlang a, Lunglei Photographers’ Association-in Kût Hraite an thlan bakah, photo booth leh photograph exhibition an buatsaih bawk.

Champhaiah chuan District Sports Complex-ah Sub-Hqrs. YMA Champhai kaihhruaiin hman a ni a, Health & Fa­mily Welfare Board vice chairman Dr ZR Thiamsanga, MLA chu kut pa niin, district bawrhsap SL Naveen chu kût uaptu a ni. Kûta tel naupang kum 6 hnuai lam, Mizo hnam incheia inchei nalh mipa leh hmeichhe thlan a ni a, Chapchar Kut Miss 2020 pawh thlan a ni.

Chapchar Kût hi Kolasib-ah chuan Diakkawn khelmualah hman a ni a, minister of state Lalruatkima chu kut pa niin, district bawrhsap Sangchhin Chinzah chu kût thlengtu a ni. Hnam làm leh zai chi hrang hrang entir a nih bakah, chaw fâk hun siam a ni a, kût hmangtute'n an chaw fûnte an ṭhet a ni. Indian hockey player Lalremsiami, FIH Women’s Rising Star of the Year Award 2019 hnenah chawimawina an hlân bawk.

Mamitah chuan Chapchar Kût hi GSA playground-ah hman a ni a, district bawrhasp Dr Lalrozama chu kut pa niin, YMA sub-headquarters, Mamit president K Eley Rosanga chu kût thlengtu a ni.

Mamit khawpuia YMA branch hrang hrangte leh Dampui YMA-in cheraw bu 17 an entir a, malzai leh huho zaite ngaihthlak a ni. MHIP branch hrang hrangin párlàm leh siktuithiang làm an entir bawk. Mizo infiamna hrang hrang - insuknawr, insukherh, insaihruipawh, inbuan, kalchhet inkalsiak leh inarpa sualte entir a ni.

Siaha khawpuiah pawh Chapchar Kut hi District Playground-ah hlim taka hman a ni a, MTP president PP Zalena chu kut thlengtu niin, district bawrhsap Bhupesh Chaudhary chu kût pa a ni. Kût pa chuan, Chapchar Kût thupui 'Zo nun ze mawi chawi san' tih chu hre reng a, Mizo nun mawi leh ṭhate lantir zel turin kût hmangtute a chah.

Chapchar Kutah hian LWA, MChP, MHIP leh MUP-ten hnam incheina an entir a, YLA, MTP leh YMA-te'n hnam làm an entir thung. District chhunga mi hmingṭha, khawtlanga inhmang, social worker leh state, national leh international level-a infiammi hmingṭhate leh State Games 2019-a gold medalist-te hnenah chawimawina nupui hlan a ni. Chapchar Kut Nula atan Carolyn C Ro­hlupuii, New Siaha an thlang a, Chapchar Kut Tlangval atan Jeremy Lalruatsanga Hnialum, New Siaha an thlang bawk.

Chapchar Kut hi Khawzawlah chuan field no. 1 ah hman a ni a, Kut Pa, DC H Lianzela chuan Chapchar Kut chu district mipuite tana malsawmna thlentu ni tura a duh thu sawiin, "Chapchar Kut hi hlimna ni a ni a, kan pipute kha Chapchar Kut hman chhung hian an inhau ngai lo, inhauh awih a ni lo," a ti.

Kut lawmnaah Khawzawl khawpui chhunga YMA branch 10 leh sorkar department hrang hrangin Zopa In 10 sa-in department hmalaknate an tarlan bakah,  Mizo kut chhuak chi hrang hrang - Zupui, Zufang, Bal, Kawlbahra, Chhangban leh thildang te zawrh chhuah a ni.

Assembly deputy speaker Lalrin­awma chu Sialhau khuaa Chapchar Kutah kûtpa a ni a; thu sawiin, "Hnam reng reng mahni hnam ziaráng tibo ṭhin hnam ropui an awm ngai lo. Chapchar Kût a lo thlen hian, mi ngo an fing ber a, an huai ber tih tun hmaa ri ṭhin hi paih bo ang u, keimahni leh keimahni kan inhlut thiam a pawimawh," a ti.

MLA Lalrinsanga Ralte, Rubber & Allied Crops Development Board vice chairman pawhin a bial chhunga Vairengte-ah Chapchar Kut a hmanpui. Vairengte-ah hian YMA branch hrang hrangin cheraw an kân a, hlado chham a nih bakah, Mizo infiamna chi hrang hrang buatsaih a ni.

Champhai district-a Samthang khuaah pawh YMA huaihawtin an khaw khelmualah Chapchar Kût an hmang a; kumpuan 'Zirna uar' chu Tuipuiral group YMA vice president JH Lalkrosthanga'n a hawng nghal a ni.

Phuaibuang pawhin an khaw khelmualah Chapchar Kut hmangin an YMA president hlui Lungmuana chu khuallian a ni a, Vanlalchhuanga (MPS Rtd) chu Kut Pa a ni.