Minister-in Surveyor Training Institute tur a tlawh

Land Revenue and Settlement (LRS) minister Lalruatkima chuan May 24, Zirtawpni tlai khan Surveyor Training Institute (STI) dinna tur Hualngohmun daia mi a tlawh.

Lalruatkima chuan, STI din a nih theih nan thuneitu sang zawkah a ṭul dan anga thlen a tum thu leh, STI dinna atan 15th Finance Com­mision-ah cheng vbc. 15 dil mek a nih thu a sawi. Minister chuan, STI din ṭul a tih avangin department hotute nen a sakna tur hmun an tlawh a, chak leh zuala hmalak dan tur an sawiho nghal.

Sorkar thuchhuah tarlan danin, STI dinna tur hmun hi LRS depart­ment chuan kum 2006 khan mimal ram lei khawmin, bigha 24.22-a zau ram a nei tawh a, a hmunhmá chu kháwl hmanga laih zâwl a nih hnuah sak ṭan hleih theih lohin a awm zui a ni. Surveyor hna thawk thei tur mamawhna a san hle rualin, Mizoramah zirna hmun a awm loh avangin surveyor hna dil thei tura training chhuak an awm mumal thei lo.

Tun dinhmunah surve­yor hna ruak sanction post 45 a awm a, thawk lai mekte pawh district tinah DC office-ahte dah tel an nih avangin an indaih loh thu LRS department hotute chuan an sawi.