West Lungdar-in Home Minister thu sawi leh an thil hriat danah inkalh a awm thu an sawi

West Lungdar village council leh NGO-te chuan thuchhuah inṭawm siamin, February 24 a an khaw naupang hnamdang pathumin an rukbo nia sawi a nih avanga thil thleng chungchang Assembly House-a Home minister Lalchamliana sawi zingah an thil hriat dan nena inkalh a awma an hriat thu an tarlang.

Home Minister-in hnamdang pathumte February ni 24, 2020-ah Silchar aṭanga lo chhuak a, Vairengte police check gate a in report anga a sawi leh tlai dar 4:45 a Hotel Leela, Ṭhuampuia in report anga a sawi chu an hriat dan nen a inkalha an hriat thu tarlangin West Lungdar LC leh NGO-te chuan, "Tukin (February 28)-ah Hotel Leela-ah an thlen dan kan va enfiah a, a thawktute chu W Lungdar naupangin amah rubotute nia a sawite thlalak entir an ni a, February 19, 2020 khan an hotel-ah an inziahluh thu min hrilh," an ti.

West Lungdar LC leh NGO-te tarlan danin, hnamdang pathumte hian Rahul-a hmingin room an book a, an pathumin room khatah an riakho a ni. An inziahluhna register-ah pawh ni 19.9.2020 zan dar 8 tiin a inziak. Rahul-a hian a address-ah ‘Lunglai’ tiin a ziak a, a phone no chu 8403072460 a ni. February ni 24, 2020-ah Rahul-a hming thoin hotel hi book leh a ni a, a phone no pawh hi a pangngai chiah hman leh a ni a, address-ah Silchar tiin a indah tawh thung.

February 24 ah naupang rukbo a ni a, kawng lak aṭang­in a tlan chhuak a ni. In a thlenin a pa a hrilh a, a pa leh a u nen motor-in an um lehnghal a, Khawrihnim mipuiten vai pathum an lo man a, naupang hi an entir hnuah an nih loh thu a sawi a, chhuahtir lehnghal an ni. February 25 ah South Sabual khaw tlangvalin motor amaha a um hnuah hnamdang pathumte hi man an ni a, mobile phone-in an thla lak niin, West Lungdar naupang hi a thlalak entir a ni. 

Naupang hian vai pathum zinga a te berin motor a khalh tih a sawi avang leh an thlalak a enin anmahni ngei a ni tih a sawi avangin misual ngeiah ngaih an ni. S Sabual aṭang hian W Lungdarah hnamdangte hi mipui ngenna angin police-te'n an phur let a, W Lungdar thlen pheiah hian police leh mipui hmaah hnamdangte hi amah rubotute ngei an ni tih naupang hian a sawi a ni. Hemi hnu hian khawtlang hruaitute ven theih lohin buaina a chhuak zui ta a ni.

Home Minister-in hnamdang pathumte February 24-a Vairengte Police check gate-a inziak lut anga a sawi chu rinthiam harsa an tih thu sawiin West Lungdar LC leh NGO-te chuan "Hotel Leela-a February 19, 2020 a thleng tawh si, an register ah pawh inziak lut tawh si, February 24, 2020 chawhma lama Vairengte a ILP la chauh anga sawi an ni si hi mak kan ti takzet a ni," an ti.