Darlawn PHC hi CHC tih theih kan inbeisei - Health Minister

Health minister Dr R Lalthangliana chuan, Darlawn damdawi-in (primary health centre) chu community health centre tih mai theih an inbeisei tawh tih a sawi a, "In mu tui thei tawh ang," tiin Darlawn mipui hmaah a sawi. Darlawn khawtlang chu an khuaah college din turin a ràwn bawk.

Dr R Lalthangliana hian nimina Darlawn khuaa Chapchar Kût a hmanpuinaah thu sawiin, Darlawn Higher Secondary School private ni ṭhin chu MNF sorkar hmasak laiin lumpsum grant-in-aid aṭangin adhoc aided-ah hlàn kai a ni tih a sawi a; "Kum heti zat a kal ta a, government provincialise-ah in awm a hun ve tawh hle. In mamawh dang leh chu college niin ka hria a, in mamawh tak zet chuan kum hnih khatah private college in din a ngai a, result leh thil hrang hrangah intih ṭhat chuan permission kan pe mai ang che u. Kan enzui zel dawn a ni," a ti.

R Lalthangliana chuan, kumina Chapchar Kût thupui 'Zo nun ze mawi chawi sàn' tih chuan kawh bîk a nei tih sawiin, He lam hawi zawnga ngaihtuahna kan sên zel a pawimawh," a ti a; hnam fing leh changkangte'n an nun ze mawi hloh an phal lo tih sawiin, Mizo mipuite chu Zo nun ze mawi  chawi sáng zel turin a sáwm. Darlawna Chapchar Kûtah hian hlado chham, hnam làm leh hnam incheina entirna hunte hman a ni. Health Minister hian nimin zing khan Darlawn damdawi-in a tlawh a; cheng nuai 140.21 sénga damdawi-in thar sakna tur hmun leh quarters sakna hmun turte a enfiah.