ZPM ṭhalaiin sorkar in sak an enfiah

ZPM ṭhalaite chuan tun hnai khan New Capital Complex-a PHE engineer-in-chief pisa tur sak mek chu an enfiah nawn leh a; in ban tur chu ft 3.5 aṭanga ft. 5 leka thûkin phun a nih thu an tarlang.

ZPM ṭhalai hruaitute hian PHE E-in-C pisa tur sak mek hi February 19, 2020-ah an endik tawh a, MNF sorkar chu an hmalakna sawifiah tura phûtna thuchhuah an lo siam tawh. March 2, 2020 khan an enfiah nawn leh a, type-IV quarters building thlangah ban phun mek a ni tih sawiin, cement concrete ban chu ft. 3.5 aṭanga ft. 5 leka thûkah phun a ni tih an hmu chhuak tih an sawi.

Type-VI quarters awm sa aṭanga ft. 10-a hláah PHE E-in-C pisa ban phun tura tih a nih laiin ft. 10 tling loah phun a ni tih sawiin ZPM ṭhalaite chuan, "In sakna tura kawngpui chhak mai ko panga ban lian tak thûk lo taka phun a nih chhan sawifiah turin MNF sorkar kan phût a ni," an ti.

ZPM ṭhalaite chuan, "PHE E-in-C office sak hna hi Congress sorkar laia kalpui ṭan niin, thil fel lo lian tak a awm ngeia ngaih a nih avangin kha tih lai khan MNF party hruaitute'n nasa takin an do a, an MLA-te pawh a hmun­ah kalin, office sak leh type-IV quarters thlanga in sak tumna chu nasa takin an sawisel a ni," an ti a; MNF hotute'n office tur sak an duh loh thu an sawi chhuahna video leh thuziakte hmuh theihin a la awm tih an tarlang.