Taxation dept.-in target an khum tawh - cheng vbc. 50 vela khum an inbeisei
Taxation department chuan kumin financial year (2020-2021) atana an target an khum tawh a, financial year a zawhfel hun chuan an target hi cheng vbc. 50 vela an khum theih an inbeisei.
Vanglaini palai zawhna chhangin commissioner of state tax Kailiana Ralte chuan February a zawh khan kum 2020-21 atana an target cheng vbc. 600 chu vbc. 10 chuanga an khum tawh thu sawiin, "Sorkar kum a la tawp loh avangin engzat chiahin nge kan target hi kan khum theih dawn a la hriat loh. Chutihrualin cheng vbc. 50 vel chuan kan khum theih ngei kan inbeisei a ni," a ti.
Kailiana Ralte chuan Covid-19 avangin an target khum theih loh an hlauhthawn hman thu sawiin, "Covid-19 avangin khuahkhirhna hrang hrangte siam a ni a, kan target khum theih loh kan hlau hman hle. Mahse, boruak a ziaawm hnuah theihtawp kan chhuah a, return file lote ngawrh takin kan umzui a ni," a ti a, an target khum ngei tumin kawng hrang hrangin ṭan an lak thu a sawi.
Zawhna chhangin Commissioner of State Tax chuan Covid-19 avangin tuialhtheiah bak chhiah lak tihpun a awm loh thu a sawi a, "Tihpun pawh tum ila zu zawrh a nih tawh loh avangin state tan chuan tuialhtheiah bak chhiah tihsan theih a ni chuang lo. Chuvangin, Covid-19 hian min ti ṭangrual takzet a, chuvangin kan target hi kum tawp hmain kan khum niah kan ngai," a ti.
Kumin sorkar kum chhunga Taxation dept.-in chhiah an hmuh tlem ber thla chu Covid-19 avanga total lockdown puan chhoh ṭan tirh April, 2020-ah niin, cheng vbc. 14.35 hmuh a ni. Chhiah hmuh ṭhat ber ṭum February, 2021-ah chuan cheng vbc. 115.29 an hmu.
Taxation dept. hi Mizoram sorkar hnuaia chhiah lalut hnem ber an ni a, state-in chhiah a hmuh state own tax revenue (SOTR) zinga 90% vel an thawhchhuah a ni ṭhin. Kum 2021-2022 budget-a SOTR chu cheng vbc. 719.56 a ni a, hetah hian Taxation dept. tum tura beisei (target) chu cheng vbc. 650 a ni.