Raltlante tuamhlawm hi kan tih tur - CM

Chief minister Zoram­thanga chuan zan thum riak turin March 24, Nilaini khan Champhai khua a tlawh a, sorkar hmalakna pawimawh ṭhenkhat a enfiah. CM chuan, "Zohnahthlak raltlante tuam­hlawm hi kan tih tur a ni," a ti.

Myanmar aṭanga Mizorama rawn raltlante chungchang sawiin Chief Minister chuan, "Loh theih lohna avanga mahni sahimna zawnga lokal kan unaute tuamhlawm hi kan tih ve ngei tur a ni. Sorkar laipuiin lo dang tura thu a pek chungchangah Union Home Minister-ah thu thlenin, manganga lo raltlante ei tur pe thei lo leh riahna pe thei lo nih chu mihring nihphung a ni lo, tiin ngaihtuahna thar seng turin ka ti," a ti a, Delhi-ah sorkar laipui hotute dawr turin palai a tirh thu a sawi.

Zoramthanga chuan Champhai chu sumdawnna hmunpui a nih theih thu sawiin, "Commercial centre bakah cultural centre pawimawh tak a la ni thei. Chumi atan chuan Champhai hi ei leh barah, agriculture a ni emaw, horticulture lamah a ni emaw, district chauh ni lo, state pum tana ṭangkai tak a ni. Ṭhenawm ram nena insumdawntawnna atana pawimawh highway laih mek hi Mizoram economy hnukpui a ni dawn," a ti. 

Chief Minister hi Champhai bialtu MLA pahnih TJ Lalnun­tluanga leh Dr ZR Thiamsanga, DC Maria CT Zuali, SP Lal­rinpuia Varte leh official dangte'n an ṭawiawm.