Lungleia PAHOSS kalpui nan Cheng nuai 400 ruahman a ni

Lunglei District High Powered Committee (HPC) vice chairman Lawmawma Tochhawng, MLA chuan, Lunglei khawpuiah Parking House Support Scheme (PAHOSS) kalpui a ni dawn a, chumi atan chuan cheng nuai 400 dah a nih thu a sawi. 

Lawmawma Tochhawng hian March 24, Nilaini khan HPC office-ah MJA General Conference hmanga Lungleia kalte tûkṭhuan a buatsaihsak. Thuthar thehdarhtute nen an inkawmnaah, "Lungleia PAHOSS kalpuina atan cheng vbc. 4 dah a ni, first phase atan ṭanpuina dawng tur, kawngpui dunga mite kan thlang tawh a, kuminah kan ti hman mai thei. Champhai leh Kolasib-ahte pawh PAHOSS hi la kalpui tum a ni," a ti.

HPC Vice Chairman chuan, Lunglei eastern by-pass road siam ngei ṭul an tih thu sawiin, "Khawpui zauh zelna atan a ṭangkai dawn a, sorkarah kan thlen tawh a, a hlawhtlin ngei kan beisei," a ti a; HPC vice chairman ni tawhte'n hna ṭha taka an thawh avanga fakawm a tih thu a sawi.

Lunglei HPC-a chief planning officer C Vanlalmuana sawi danin, HPC hi kum 1990-ah din a ni a, mahse, sum ruahman a awm lo a, hman ṭangkai a ni lo. HPC chu ṭhiat chuang loin kum 2001-ah Lunglei District Planning Board din a ni a, mahse, hnathawh mumal a awm zui lo leh a ni. Kum 2009-ah HPC leh District Planning Board chu chhùn fin niin, sum pawh pek ṭan a ni a, a tlangpuiin kum khatah cheng nuai 600 an hmu ṭhin.

HPC hian Lunglei district hma­sawnna turin hma an la a, hmalakna an kalpui langsar zingah Artui Into­delh Project te, Leitlangpui Rahbi (entrepreneurship compe­tition) te, Lunglei district-a sorkar aṭanga development fund kal reng reng en zui (monitoring)-te a tel a ni.