Sorkar sikula inziaklut an pung - Education Minister

A bial chhung fang kuala zin mek School Education minister Lalchhandama Ralte chuan sorkarin zirna a siamṭhat avangin sorkar sikula inziaklut an pun thu a sawi.

Lalchhandama chuan sorkarin zirna siamṭhat hna a thawh mek thu sawiin,"Hmar tlangdung khua leh thingtlang hmun dangah pawh zirna a tlahniam nasa hle a, zirtirtu pahnih khat lek lek awmna a tam a, sikul building pawh naupang tan zirna boruak awm theih lohna khawpa tlabalte a tam a ni. Hengahte hian a theih ang angin zirtirtu dah belh a ni a, sikul building pawh engemaw zat sak ṭhat a ni," a ti.

Sorkarin zirna siamṭhat hna a thawh avangin khaw ṭhenkhatah chuan kum hmasa nena khaikhinin sorkar sikulah naupang inziak lut a pun thu sawiin Education Minister chuan,"Sikul ṭhenkhatah chuan ṭhutna an indaih loa, classroom sak belh ngaite pawh a awm ta hial a, hei hi thil lawmawm tak a ni," a ti a, sorkar sikulte chu zawi zawiin a belhtlak zel a beisei thu a sawi.