Lal Thanhawla'n raltlante hum turin sorkar a ngen

MPCC president Lal Thanhawla chuan nimin khan thuchah ti chhuakin, Myanmar buaina avanga Zo­hnah­thlak Mizorama rawn tlanchhiate hum turin Mizoram sorkar a ngen.

Lal Thanhawla chuan Myanmar-a thil thleng chu a dem takzet tih sawiin, "Democracy ngiata mipuiin huaisen taka hma an lak mekna hi a ṭha ka tiin, kan thlawp a ni. Democracy ni tura Myanmar mipuiten huaisen taka hma an lak meknaah Zohnahthlak unaute zingah nunna chante, hliampui tuarte an awm tih ka hriatin a pawi ka ti takmeuh. Chutihrualin, ram tana nunna hlan an nih avangin ka zahin, ka ngaisang a ni. Ram zalenna atana hliam tuarte leh nunna chante thisen hi Pathianin a thlawnin a far tir ka ring lo," a ti. 

Myanmar buaina avangin Mizo­ramah raltlan engemawzat an awm thu sawiin MPCC President chuan, "BJP kaihhruai India sorkarin heng kan unau an sahimna zawngte thawn haw tura a rawn ti hi engti kawng maha pawm theihah ka ngai lo. MNF kaihhruai sorkar hi BJP thlazar hnuaia awm nimahse, an thu hi awih lo mai se ka duh hle," a ti a, Mizoram sorkar chu kan unau raltlante lo hum tur leh, anmahni enkawl nan a ṭul apiang ti tura a ngen thu a sawi.