KHAWTHLIR

Thisen pe
Adventist Youth Federation (AYF), Kolasib branch chuan nimin khan Global Youth Day pualin Kolasib District Hospital tan thisen unit 24 an pe. Thisen petute hi mipa 19 leh hmeichhia panga an ni.

Consumer Awareness
Nimin khan Mamit Chhimveng YMA Hall-ah District Supplies Office leh Mamit District Consumers Organisation (MDCO) bultumin Consumer Awareness Campaign neih a ni a, bawrhsap Dr Lalrozama'n khuallian niin a hmanpui. Dr Lalrozama chuan thil lei leh hralh thuah dan hriatchian a pawimawh thu sawiin,"Consumer tih hian mi tin min huap a, dawrkai thil zuartute pawhin an dawra an zawrh loh mamawh dang an neihte hmundang aṭanga an lei emaw lak a ngaih ve tho avangin kan zavai hian consumer kan ni," a ti.

DC-in tlawh
Khawzawl district bawrhsap Zothanmawia chuan nimin khan district chhung khaw hrang hrang - Tualte, Chalrang, New Chalrang leh Lungtan khuate a tlawh a, Tualte khua-a Tualte Vanglai Committee-in an khaw lal Vanhnuailiana Sailo leh midangte hriatrengna lungdawh an siam chu a hawng nghal. Bawrhsap hian khawtlang hruaitute kawmin khawtlang dinhmun, an mamawh leh hmalak dante a sawipui.

Heroin man
Excise & Narcotics department (END) hnuaia Anti-Narcotic Squad leh 46th Assam Rifle-te chuan March 24, Nilaini zan khan National Highway, Tuirial-ah heroin gram 90 (hawng sarih) leh a neitua puh Lalramhlunmawia (31) s/o Vanlalchaka, Tlangsam, Champhai district-a khawsa nia inchhal an man. Lalramhlunmawia hi The Narcotic Drugs & Psychotropic Substances Act, 1985 tlawhchhanin thubuai siamsak a ni.

Pisa hawng
Mizoram Youth Commission chairman Dr Vanlalṭanpuia, MLA chuan nimin khan Khawzawl District Research Officer’s Office cum Office of the Assistant District Registrar’s Office a hawng.