MPF-in thawhhona thuthlung zawm lote lakah thuthlung anga hmalak an tum thu an puang

Mizoram People Forum (MPF) General Headquarter hruaitute chuan nimin khan Serchhip Press Club-ah thuthar thehdarhtute kawm­in, political party-te chu thawhhona thuthlung an siam dun zawm turin an ngen nawn a, bawh­chhiat luihna a awm a nih chuan thuthlung anga hma an lak tur thu an sawi.

MPF vice president Rev. K Lalrinmawia chuan inthlan dawna min hmangaih thar thut vang te, kan damlo min kan vang te, contract hna pek min tiam vangte leh sorkar hna sawipui/ pek min tiam vang ngawtin tumah vote phah lo tura mipuite chahin, "Tunhma kha leh chena min vei ngai hlei lo min rawn vei thar thutte hi hmangaihtu der an ni duh khawp. Thilpek avanga vote petu chuan a ram leh ama hlutna a hralh a ni," a ti.

Voter tinin zalen taka ngaihtuahna an sen theih nan party-te'n insawiṭhaih leh invauna an chelek tur anih loh thu sawiin Rev. K Lalrinmawia chuan, "Mipui kan rinawm phawt chuan party-te'n hmanraw thianghlim lo an hmang ngam lo ang," a ti a, hmanraw thianghlim lo chelek duh chu ram leh hnam hmelma an nih zawk thu a sawi. 

MPF Vice President chuan MPF chu eng party unit mah a ni lo tih sawiin, "Eng party supporter mah a ni hek lo. Eng party pawhin 'MPF nen kan ṭangho, MPF hi kan unit pakhat a nimai' ti hialin sawi mah se dawt a ni. MPF hian tu party mah duhsak bik leh thlauhthlak bik a nei lo. Dawt hmanga mahni rawn insawimawi an awm anih pawhin lo hnawl ngam ang che u," a ti. 

Rev. K Lalrinmawia chuan party dang leh an elpui candidate sawi­chhiatna leh sawihnawm­na ringawt thupui bera neite'n ram an hmangaih loa, lalna an hmangaih tih sawiin, "Chutianga mi dang sawichhiatna tuipui bera neih chuan ram hmasawnna an ngaihtuah thleng lo," tiin a sawi. 

Tu emaw hnena 'hei ka vote che' tih finfiahna (thlalak emaw) lek chhuaka party worker/candidate hnen aṭanga thilpek dawn beisei chuan ram dan a bawhchhia tih sawiin Rev. K Lalrinmawia chuan, "A ram, amah leh an bial a hralh a ni. Polling booth-ah thla la suh u; in chung a rip hle mai ang. A ruka vote lei duh chuan a ruk vekin bial mipui a hralh hreh lo,” a ti a, vote leitu chuan khua leh veng chanai eiruk a hreh loh tur thu a sawi.

MPF general secretary Rev. R Lalnuntluanga chuan social media hman fimkhur a ṭul thu sawiin, "Mipui bum hmang an awm a nih chuan election commission-ahte, CID cyber crime-ahte MPF chuan a hriattir nghal dawn a ni. MPF chuan sum seng vak vak loa hautak lo thei ang bera inthlan a duh avangin flag leh banner tar theih chin thuthlung anga zawm tur leh ruai­ṭheh pawh huaihawt lo turin party-te a ngen nawn a ni," a ti.

Thusawitu dang MPF adviser Vanlalrema Vantawl chuan thawhhona thuthlung hi zawm tum aiin pumpelh tum hramna a awm fo ṭhin tih sawiin, "Tun hmain thawhhona thuthlung bawhchhiat a awmin hma lo lak tawh ṭhin a ni. Thawhhona thuthlung tharah bawhchhe luite laka hmalak dan tur na zawka siam thar a ni a, bial chhunga puanzar bakah rampum media thlenga puanzar theih a ni tawh," a ti a, MPF chuan thawhhona thuthlung an kenkawh tlat dawn thu a sawi.

Thuthar thehdarhtute an kawm zawh hian MPF chuan Serchhip Kawnpui Presbyterian Kohhran diamond jubilee hall-ah MPF local forum 12 leh political party block leh unit-te pualin thawhhona thuthlung zirhona an buatsaih.