MSU-in dan kalha MRB-a thawka an puhte Mizoram chhuahsan vat turin an hriattir

Mizo Students' Union (MSU) chuan Mizoram Rural Bank (MRB)-ah dan kalha thawk mek mi paruk an awm thu sawiin, tun thla chhung ngeia Mizoram chhuahsan turin an hriattir.

MSU hian nimin khan Aizawl Press Club-ah thuthar thehdarhtute kawmin, an president J Lalmuanzuala chuan MRB chu Regional Rural Bank (RRB) Act hmanga din a nih angin sorkar bank a nih thu sawiin, "RRB hnuaia hnathawk turte hi Institute of Banking Personnel Selection (IBPS) Common Recruitment Exam buatsaihin lak ṭhin a ni. Candidate-te hian form an fill up laiin, an hnathawh duhna state an thlang ṭhin," a ti.

J Lalmuanzuala chuan RRB hnuaia lakte chu an awmna state ṭawng an thiam bel a ngaih thu sawiin, "Mizoramah chuan state pawn lam mite chuan Mizo ṭawng pawl riat chin emaw a tlukpui Local Language Proficiency (LLP) tal an neih a ngai a ni," a ti a, RRB rule-ah chuan group B chin chuan lak an nih aṭanga thla 18 chhungin LLP Test an paltlang ngei ngei a ngaih thu a sawi.

MSU President chuan mi paruk MRB branch hrang hranga chhawr mekten LLP Test an paltlang theih loh thu sawiin, "Chuvangin an service hi terminate tur a nih piah lamah danin a phut ang thiamna an neih theih loh avangin service disqualify tur an ni," a ti.

Serchhip MRB Branch-a asst. manager Punit Kumar Jha hoa inthurualin SBI Corpo­rate, Mumbaia Chief General Manager hnenah Mizoram Rural Bank Management chu dawtin an hek tih sawiin J Lalmuanzuala chuan, "An heknaah chuan LLP Test chu an hna aṭanga chawlhtir theihna hmanrua atan an thawhpuite'n an hman thu leh leh MRB Managment chu rintlak loah an puh," a ti a, MRB tih hming chhiat tumnaah an ngaih thu an sawi.

MSU chuan Mizoram tana hnathawk turin thliar bik an nei lo tih sawiin, "MRB-ah ngei pawh hian dan ang thlapa thawk hnam dang engemawzat an awm a, chungmite chu sawiselna kan nei lo. Kan sawisel theih pawh a ni lo," an ti.

MRB-a dan loa thawk mek mi parukte chu tun thla chhung ngeia Mizoram chhuahsan tura an phut thu sawiin MSU chuan, "Anmahni ban theitu Chairman leh General Manager pawh an paruk hian ban ngei turin kan phut a, an ban loh chuan an lakah pawh hma kan la ang," a ti a, tun thla chhunga mi parukte an chhuak lo emaw, hmalakna a awm lo a nih chuan thil ṭha lo zawk a thlen pawhin mawh an phurh loh tur thu an sawi.