Aizawl Adventist Hospital kum 25-na Minister Dr Thangtea'n hmanpui
Health minister Dr R Lalthangliana, Higher & Technical Education enkawltu ni bawk chuan nimin khan Aizawl Adventist Hospital din champhaphak vawi 25-na lawmna leh Aizawl North College-a national seminar a hmanpui.
Aizawl Adventist Hospital Silver Jubilee lawmnaah Dr R Lalthangliana chuan thu sawiin, "Aizawl khawpui, a bik takin tlak lam vengah hospital ding hmasa ber leh rei tak chhunga damdawi-in awm chhun a nih avangin a hlu hle," a ti a, hospital dangin an tih theih loh ti theitu leh bul ṭantu an nih thu a sawi.
Aizawl Adventist Hospital hi kum 1996-a din a ni a, India hmarchhaka Adventist Hospital ding hmasa ber a ni. A tirah khum 10 nen bulṭan a ni a, tunah khum 50 leh thawktu 80 an nei mek.
Higher & Technical Education minister Dr R Lalthangliana hian 'Urbanization and its Impact on Environment' tih thupui hmanga Aizawl North College-a buatsaih national seminar a hawng.
Dr R Lalthangliana chuan Mizoram mipui hmun lia ṭhena hmun khat chu Aizawl khawpuia cheng an nih thu sawiin,"Hei hian sik leh sa chauh ni loin hmunhma indaih lohna a siam a, khawtlang nun thlengin a ṭha lo zawngin nghawng a nei a ni," a ti a, nungcha humhalh, ram tih kan loh leh thing phun uarte chin chhoh zel a pawimawh thu a sawi.
Khawpui bawha mipui pem khawm leh chu miin a hrin chhuah environment-a nghawng ṭha lo tak tak a awm thu sawiin Dr R Lalthangliana chuan, "Mipui mamawh phuhru turin ram ngaw kan ṭhiat a, chu chuan khawlum leh khawkheng a hring a, kan luite a kang chat a, lui liante pawh a kam telh telh," a ti.