Cong-in PWD hotute bula inhrosaa silai hmet puaka an puh hnuah - MNF-in Assembly Speaker an chhuang

MNF chuan thuchhuah siamin, Assembly speaker Lalrinliana Sailo-in sorkar hmun hlu tak, Chief Minister bangla awmna hlui, Mizoram hmun hlu (heritage) atan hial pawha humhalh hial phu a humhalh nia tarlangin, "Sorkar hmun hlu tak sorkar hnathawkten a tichhe zawnga kut an thlak Assembly Speaker-in a humhalh ngam hi chhuanawm kan ti a, huaisen pawh kan ti hle," an ti.

MNF chuan Lalrinliana Sailo hian a hmain sorkar department pakhat hotute a hriatthiam zel thu tarlangin, "An sawia 'Ni e, a ṭha alawm' a lo tihpui zel a ni. Tuna an kutthlakna lai tak hi chu 'em ema' ti ve tawhin, ti tawh lo turin a hrilh nawn mawlh mawlh a, chuti chungin engah mah ngai lo ang hrimin an tilui zel a ni," a ti a,ti tawh lo turin vawi sawm chuang a hrilh niin an sawi. 

Department-te'n Assembly Speaker thu hi ngai pawimawh duh loin an tilui zel nia tarlangin MNF chuan, "Mizoram tana hmun hlu humhalh ṭul a tih mai bakah, speaker zahawmna humhim a ṭul bawka a hriat avangin, officer-te hi koin a na takin a sawi ta a ni. Speaker-in a luah bedroom phei chu chhun leh zan zawma parda zar reng ngai khawpa thaw ipika dipdal a ni zo tawh. Hetia department officer-te'n sum chuangtlai bel ral nana hmun hlu tak tichhe zawnga hma an la hi MNF chuan ṭha a ti lo," an ti.

MNF chuan MPCC-te'n Lalrinliana an bei chu an party aṭanga MNF a zawm vanga chhe taka chhuah tumin an umzui bik hrim hrimah an ngaih thu sawiin, "Hun kal tawhah pawh Pu Lalrinliana thiltih reng reng hi sawiselsakin an lo umzui fo tawh," a ti.

Tarlan tawh angin Congress chuan thuchhuah siamin Speaker hi PWD hotute bulah inhrosain silai a hmet puak tiin an lo puh tawh a ni.