Tlin lohna nei kan ni - MPCC Vice President

Nimin khan MPCC chuan Serchhip Venglaiah mithar lawmluh inkhawm an buatsaih a, MPCC vice president Lalsawta chuan an party chu tlin lohna nei an nih thu a sawi.
MPCC Vice President chuan an party-ah ZPM anga miṭha inti inkhungkhawm an tum lo tih sawiin, "Mi ṭha lo, mi fel lote pawh kan inkhungkhawm a, kan tlin lohna nena enchhin tawh kan ni. Tlin lohna nei, tihsual nei kan ni, tihsual aṭanga inzir zel tur kan ni. Congress hi mi ṭha bawm a ni lo ang, mahse mi tling lo te te awmkhawmna kan ni ang, kalphung tur ruahmanna fel nen hma kan la ang, chumi  bawm chu mi zawng zawng lenna tur bawm a ni ang," a ti.
Serchhip mipuite vanneihna dawn chu Mizoram hmun dangin an dawn ve loh a nih thu sawiin Lalsawta chuan, "Chief Minister ṭum 5 ni thei bial in ni. Bial hniha a dinkawp nena MLA atana vawi 12 tling thei a ni a, ani ang hi Mizoram hian kan nei leh tawhin ka ring lo. MNF sorkar an vanneihna em em, Mizoram hmalam hun zel tur atana ṭha miah si lo an neih chu Chief Minister ṭawng mai mai, a thusawi apiang  mipuiin ngaihdan tawk an nei zel a ni," a ti a, CM Zorama chuan mi pawi pawh a sawi theih tawh loh thu a sawi.
Serchhip bial MLA by-election a INC candidate PC Laltlansanga chuan thlan tlin a nih chuan Serchhip bial mipuite tan a theih ang tawka a inpek tur thu sawiin, "Ka khingpuite hi mi ropui leh chhungkaw khawsak ah pawh ka tluk lohte an ni, mahse he bial mamawh hrang hrang kei aia hrechiang leh kei aia inpe thuk tur an awm lo," a ti.