Cheng nuai 7 tihchingpen thubuaiah Court-in kum 3 tang turin IAS a hrem

Mizoram sorkara secretary Rodney Lalrinawma Ralte, IAS chu Court of Special Judge (PC Act)-a special judge Thang Lianmang Guite chuan cheng nuai 7 a tihchingpen avangin kum 3 jail tang tur leh Rs. 5,00,000 chawi turin a hrem.

Sorkar ukil Lalremruata hnen aṭanga Vanglaini thudawn danin, Rodney L Ralte hi Mamit DC a nih laiin Vigilance department chuan ni 3.7.2012 khan Anti Corruption Bureau (ACB) hnenah Dampa Tiger Reserve aṭanga Andermanik khaw sawnna tur sum tihchingpen a awm nia sawi chhui chiang turin a hriattir a ni.

Vigilance dept. tarlan dan chuan Andermanik khaw sawnna tur sum hi Mamit DC-in a dawng a, 3% chu tihchingpen a ni. Mamit DC-in sum a dawn hi Rs. 7,45,70,000 a nih laiin, Rs. 5,29,75,000 pek chhuahna chiah hriat theih a ni. He thubuaiah hian ACB chuan ni 5.7.2012 khan preliminary enquiry ti turin case an register a, a chhui hna thawk turin DSP VL Lura ruat a ni. He thubuaiah hian finfiahna a ṭhat tawk loh avangin Rodney L Ralte hian thiam loh a chang lo.

Hetihlai hian thubuai chhuina kal zelah hian National Tiger Conservation Authority (NTCA)-in sum a sanction cheng nuai 2,770 tihchingpen a awm tih hmuh chhuah a ni. NTCA sum hi state level-ah chuan Chief Secretary chairman na State Level Monitoring and Evaluation Committee-in an buaipui a, district level-ah chuan district level implementing committee (DLIC)-in an buaipui thung. DLIC-ah hian Rodney L Ralte chu DC anih angin chairman a ni. Hei vang hian Rodney L Ralte lakah hian FIR a lut a, ni 31.5.2013 khan thubuai ziah luh a ni.

He thubuai chhui tur hian inspector F Engkunga ruat a ni a, hun eng emaw chen a chhui hnuah sum tihchingpen a awm ngeia hriain ni 15.12.2017 khan a thil chhuina report (chargesheet) chu Court-ah a thehlut a ni. Chargesheet-a tarlan a nih dan chuan Rodney L Ralte hian cheng nuai 14 a ti chingpen a ni.

Court chuan hun eng emaw chen a ngaihtuah hnuah nimin khan thutlukna a siam a, Rodney L Ralte hi kum 3 chhung hrehawm taka jail tang tur leh Rs. 5,00,000 chawi turin a hrem a, pawisa hi a pek theih loh chuan kum khat chhung a tan belh ang. Hetihlai hian chargesheet-ah cheng nuai 14 a tichingpen anga tarlan ni mah se, finfiahna leh thuhrehtute thusawi aṭangin Court chuan cheng nuai 7 tichingpenah a ngai a ni.

Court-in thutlukna a siam hnu hian police-in Rodney L Ralte hi an man nghal a, mahse Court chuan thla khat chhung atan interim bail in a chhuah leh nghal. Thla khat chhung hian Rodney L Ralte hi court sang zawk Gauhati High Court-ah a zualko tur a ni a, a zualko lo a nih chuan police-in an man ang.