Vawiin aṭangin zu khapna dan

Mizoram sorkar chuan vawiin aṭangin zu khapna dan Mizoram Liquor Prohibition (MLP) Act, 2019  hman ṭan a tum a, dan hmang ṭan tur hian Law & Judicial department chuan notification a chhuah ang.

Vanglaini palai zawhna chhangin Excise & Narcotics minister Dr K Beichhua chuan vawiin aṭanga MLP Act hman ṭan ngei an tum thu sawiin, "Law & Judicial department chuan thil ṭul leh pawimawhte an ti fel hman tawh a, vawiinah notification tih chhuah hman ngei tum a ni," a ti.

MLP Bill chu March 20, 2019 khan Assembly House-ah pawm a ni a, chumi hnuah Governor-in pawmin, dan puitling a ni tawh a ni. Mahse, Lok Sabha inthlan puan a nih avanga Election Model Code of Conduct hman a nih avangin Election Commission of India chuan MLP Act hmang tura notification chhuah a khap a ni. 

Nimin khan Election Model Code of Conduct hi a tawp tak avangin Mizoram sorkar chuan notification chhuaha zu khapna dan hi hman a tum ta a ni. Kum 1984 khan Mizoramah zu dawr hawn ṭan a ni a, hemi hnu hian khap tak tak si lo, phalrai bawk si loa hun eng emaw chen a kal hnuah kum 1995 khan Mizoram Liquor Total Prohibition Act siamin kum February 20, 1997  aṭanga hmang ṭanin zu khap a ni. 

Kum 2014 khan Mizoram Liqour (Pro­hibition and Control) Act siam a ni a, January 15, 2015 ah hriattirna chhuahin hman ṭan a ni a, March 16, 2015 aṭanga zu zawrhna dawr hawn ṭan a ni.