KHAWTHLIR
Designation plate tar loh rel
Zoram People’s Movement (ZPM) MLA-te tun hnaia ṭhukhawm chuan Assembly Session lai leh official programme-ah lo chuan an car hmaah MLA designation plate dah loh ni se, an ti. ZPM MLA-te chuan, "VIP culture tih bo duhtu pawl kan nih angin MLA-te hi hmahruaitu-ah ṭan ṭha kan ti. Official programme-a an kal dawn pawhin, official-te tana harsatna a thlen lohna turin MLA designation plate hi an kalna tur hmun thlen dawnah chauh tar ni se," an ti.
Suat dawn
Luidung sangha humhalh nan, sangha dangte tana him lo Clarias Gariepinus (Magur) suat tura din Inspection Team-te chuan Mamit SDO (Sadar) HD Lalpekmawia hoin nimin khan sangha suat dan tur hi an rel. Meeting-a rel a nih dan chuan Inspection Team-te hian vawiinah Zawlnuam leh Kanhmun-a tuikhuahahte Magur hi an suat dawn a, Mamit district chhunga tuikhuah dangahte pawh a tahtawlin an suat ang.
Zirlai chawimawi
Sialsuk HSS Managing Board chuan nimin khan Sialsuk HSS atanga HSSLC pass tharte lawmpuina hun chu an khaw YMA Inpuiah an buatsaih a, khuallian bialtu MLA prof. F Lalnunmawia chuan "Zirtirtu indaih loh zual phuhruk nan sorkar chuan ruahmanna siamin MR Teacher lak a tum a. ṭhenkhatten 'fair lo taka he hna lak hi kalpui an tum' tiin min puh a, fair lo taka kalpui kan tum lo a, a tling leh thiam (trained teacher) ngei lak kan tum," a ti. HSSLC pass tharte hi lehkhabu 'Zirna Kailawn' leh citation pek an ni.
Dincham lawm
Students' Self-Suppport Union (SSU) chuan nimin khan Govt. Hrangbana College-ah an dincham vawi 34-na an lawm a, an president Lalnunhlima chuan ram leh hnam damna atan zirna a pawimawh thu sawiin, "Hlawhtling tur chuan retheih hmasak a ngai," a ti. Resource person C Zorammuana, IPS (Rtd) chuan 'Aspect of Personality Assessment' tih thupui hmangin thu a sawi. SSU hi May 27, 1985 khan din a ni.