Tlin loh chhuanlam siam loh tur - Lalnghinglova Hmar
Lok Sabha MP inthlan neih zawh taka ZPM leh Congress thlawp independent candidate Lalnghinglova Hmar chuan, chak loh chhuanlam siam a tum loh thu a sawi a, amah tantute pawh an chak loh pawm thiam turin a chah.
Lalnghinglova Hmar hian nimin khan ZPM pisa-ah thu a sawi a, "Chak loh chhuanlam siam loin, kan hun a la ni lo tih pawm tur. Theihtawp kan chhuah a, kan tlin leh phak tawkin kan bei. Pathian hnenah kan in kawltir a, kan dinhmun hi lawm taka pawm mai tur. Hun
ṭha a la in her chhuak ang tih hi rin tlat tur," a ti.
Tetea Hmar chuan vote hmuh dan sawi zui hlawh tak chu sawiin,"Vote hmuh san falna bial kan nei a, inbeih tawkna bial kan nei a, bial puma vote hmuh ve mang lohna bial pawh kan nei," tiin vote a hmuh tlemna hmunte chu chak loh chhuanlama hman bik a tum loh thu a sawi.
A duhthusam chu tlin a nih thu sawiin Lalnghinglova chuan, "Tling zo lo mah ila ka vui lo. Pathian hnenah a duh loh zawnga campaign lo turin kan dil a, kan tihlawhtling theiin kan inhria a, kan lawm hle. Kan la ti dawn chauh a, tun ṭum hi chu kan bul ṭanna chauh a ni a, a aia nasa zawkin kan bei ang. Ka beidawng lo," tia sawiin, kum 2019-ah chiah inthlan a awm dawn lo tih hriat a pawimawh thu a sawi.
Lalnghinglova chuan amah duhsaktu ṭhenkhatten MP candidate a nih vang ringawt pawha an ui thu an hrilh tih sawiin, "MP candidate ka ni ve hi inchhirna ka nei lo. Chhan neiin ka ding a, duh lo neia ding ka ni. Vawi khat chauh kan dam dawn a, Mizoram leh hnam tana ṭha lo nia ka hriatte do tura ka pen chhuak thei hi ka lawm. Mizo mipui min vote-tu zawng zawngte chungah lawmthu ka sawi a ni," a ti.
Tetea Hmar chuan social media lama politics-a inbeih dan chu thlak theih se a duh thu sawiin, "Kan inbeihna level hi tun aiin tisang hret ila kan ram tan a ṭhat zawk a rinawm," a ti a; political party hrang hrang member mi tha tak takte pawhin social media a nih tak avanga tawngkam an thlahdah chu tha a tih loh thu a sawi.
Politician-te fakin, "Hun rei lo te chhung politics-a ka zuan luh hian politician-te fakawm zia ka hmu. An tumruh zia, an chhel zia, an beih nasat zia leh an theihna zawna ram an hmangaih ziate ka hmu a ni," a ti a; politician fel vak lo awm mah se, politician zawng zawng misual anga hmuh chu thil dik a nih loh thu a sawi
Central lamah BJP an sorkar leh dawn tak avangin kan hma hun kan hre lo tih sawiin Lalnghinglova chuan, "Kan thil hlauhte hi vawi khatah an tihlawhtling bur lo mai thei. Mahse, an thil tum ber chu India ram hi Hindu lal rama din a ni. Inthlan lehah chuan party ringawt ngaihtuah lo a, kan ram leh kan hnam tan eng nge him ber, eng nge kan thu inchuh ngaihtuah ṭhin tawh ila ka duh hle," a ti.
Thusawitu dang, MLA by-election-a ZPM leh Congress thlawp independent candidate Lalbuanga Sailo chuan inthlan zawh takah ZPM leh MPCC-te thawhhona a ṭhaa a hriat thu sawiin, "An nihna dah ṭhain theihtawp an chhuah a, an inkarah khi awmin ka hre lo," a ti a, ZPM leh MPCC-te chu a tlin theihna atan theihtawp chhuaha an campaign ve ve thu a sawi.
Lalbuanga Sailo chuan an chak lohna a tam viau chhan mi hrang hrang a zawh kual thu sawiin, "Kan chak loh tam chhanna report ka dawn ṭhenkhatte chu ruling party kan khin vang te, sum chelek nasat vang te, Pu Duhoma'n an a bial a chhuahsan avanga rilru na an tam avangte leh sorkar hnathawkin vau an tawh nasat avangte a ni," a ti.