ZPM leh Congress-in vote 1,10,870 an hloh - Dr R Lalthangliana

MNF vice president Dr R Lalthangliana chuan nimin khan Mizo Hnam Runah thu sawiin, Lok Sabha MP inthlan neih zawh takah ZPM leh Congress party ṭangrualin MLA inthlana an vote hmuh nen khaikhinin vote 1,10,870 an hloh tih a sawi.

Dr R Lalthangliana chuan MLA inthlan hnuhnung bera ZPM leh Congress vote hmuh belhkhawm chu vote 3,27,016 a nih thu sawiin, "MP thlana an vote hmuh belhkhawm chu vote 2,16,146 a ni. ZPM leh Congress hian nikum inthlan aiin vote 1,10,870 laiin an hmu tlem zawk. Keini MNF erawh chuan hma kan sawn hle a, kum 2018 inthlan khan kan vote share chu 37.58% a ni a, tun MP inthlanah hian 44.89% zet kan hmu tling pha a ni," a ti a, party pahnih beihrawn an ni chunga an vote hmuh chu a lungawi thlak tih a sawi.

MNF sorkar ringtawka MP leh Aizawl West-I MLA by-election-a an candidate-te an tling chu lawmawm a tih thu sawiin MNF Vice President chuan, "Zu zawrh kan titawp a, kawngpui kan siam ṭha a, school timing siam­rem a ni a, lifetime vehicle tax tihtawp a ni. MR hlawh tihpun a ni a, AR sawn chhuak turin tihfel thawkhat a ni tawh. Thla thum emaw chauh hnathawhna hun nei chungin ti ṭha thawkhat mah ila, mipui mimir thleng phak kan flagship programme SEDP kan la kalpui hman lo. Tin, keimahni pualin budget pawh kan la nei hman lo, heti chunga mipui rin kan hlawh hi a lawmawm tak zet," a ti.

Dr. R Lalthangliana chuan Congress kum 10 sorkar khan chhunzawm tlak thil tih a nei ve nual tih sawiin, "Medical college, hmabak tam tak neia an kalsante hi changtlung taka buatsaih chho turin chak takin hma kan la mek a ni. Lunglei Engineering College tur quarter, kawng leh tui la awm lote pawh hi buaipui a ni ang a, kum 10 Congress sorkarah khan Aizawl Municipal Corporation (AMC) hi a nih dan tur a ni lo nasa hle," a ti a, khawpui hmel tidanglam dawrh turin a dintu MNF ngeiin AMC hmanga hma an lak chhoh dawn thu a sawi.