Goa-ah plastic khap dan zirchiang dawn

Aizawl Municipal Corporation (AMC) bultumin MJA member pakua chuan Goa-a plastic aṭanga thil siam an khap dan an zirchiang dawn a, Goa kal turte hi nimin khan AMC commissioner Dr H Lalthangliana'n Aizawl Press Club kawt aṭangin a vai liam.

Dr. H Lalthlangliana chuan, India rama Smart City 100 thlan zingah Aizawl khawpui pawh a tel tih sawiin, "Smart city-a telte chu October 2, 2019 aṭangin Plastic Free City ni tura tih an ni a, chuvang chuan Aizawlah pawh kumin August 1 aṭangin plastic bag, polythene khap tum a ni," a ti.

AMC Commissioner chuan, Aizawla polythene khap tur chu danin a khap chin, mipui tana phurrit lo thei ang ber turin kalpui a ni dawn tih a sawi a, "Aizawl khawpui Plastic Free City-a puanna turah, thuthar thehdarhtute an pawimawh avangin Panaji, Goa-a a plastic bag khapna an kalpui dan zir tur hian kan duh a ni," a ti a,  MJA member-te chu Mizoram leh Aizawl khawpui tana ṭangkai zir chhuak turin a chah.

MJA president Zonun­sanga Khiangte chuan, Aizawl khawpui tana thil pawimawh zir chiang tura AMC-in MJA member-te a ring ngam chu lawmawm an tih thu a sawi a, "Min rin ngam ang ngeiin theih­tawp chhuah kan tum a, kan ram leh kan khawpui Aizawl tana chhawrnahawm, mipui tana ṭangkai rawn hawn ngei kan tum dawn a ni," a ti.

Plastic khap a nih dan zirchiang tur hian Zonunsanga Khiangte (Lenlaini & Zonet Zing Daifim), Lalremsiama (Zawlkhawpui), C Lalhma­chhuana (Youth Herald & Zalen), C Lalzamlova (Chhawr­pial), C Lalduhawma (LPS Vision), Lalrinmawia Sailo (Thlirtu), Alfred Vanchhawng (DDK), J Malsawm­zuala Van­chhawng (Zonet) leh K Zothanpara (Vanglaini) te an kal a ni.