Lirthei intlanchhawk enchhin turah IGP-in mipui thawhpuiah sawm

June 1, 2019 aṭanga thla khat chhung lirthei intlanchhawk kalpui chhin turah IGP (Hqrs) John Neihlaia chuan lir­thei neitute leh mipuite thawhho puiah a sawm a, "Mizo chu inthu­rual hnam kan nih angin traffic jam nasa lutuk a zia­awm ang a, sorkar rua­hmanna hi a hlawhtling ngei ang," a ti.

Nimin khan Aizawl SP conference hall-ah IGP leh traffic hotute chuan June 1 aṭanga lirthei intlan chhawk tur­ah thuthar thehdarhtute an kawm a ni. John Neih­laia tarlan danin, Aizawl district-ah kumin May 10 thleng khan lirthei 1,70,123 awmin 70% (1,19,086) chu Aizawl khawpuia awm anga chhut a ni. Lirthei tlan loh ni hman meka ding zat 11,909 anga chhut a ni a, ruahmanna thar June 1,2019 aṭanga hman a nih hunah nitin lirthei 23,818 ding tura chhut a ni.

IGP chuan lirthei in­tlan chhawk hunah chuan minister-te pawh a huam vek tur thu a sawi a, "Sorkar motor leh mimal motor-te leh two-wheeler phalna pek bik tih loh chu a huam dawn. Lirthei a vaia tlan ni tur chu Inrinni leh Pathianni bakah sor­kar chawlhni ah a ni ang a, taxi-te chu an intlan chhawk ang pangngaiin an tlan ang," a ti. 

Tuna intlanchhawk mekah hian thla khatah lirtheite vawi thum an din laiin, enchhin thar turah hian lirthei pakhat thla khatah vawi li emaw vawi nga an ding dawn a ni.