KṬP General Conference neih mek a ni

KṬP General Conference vawi 58-na chu February 27, Ningani zan khan Leisekawt Field, Serchhipa ṭan a nih hnuah neih mek zel a ni a; nimin khan report inkhawm neih niin, vawiinah rorel inkhawm neih a ni ang. Report hnuhnung bera a lan danin, KṬP-ah hian member 1,54,441 an awm.

Nimina Report Inkhawma tarlan danin, KṬP-ah hian pastor bial 207-ah branch 879 an awm a, chung zinga branch 48 chu Mizoram páwna mi a ni. KṬP member 1,54,441 awmin, mipa 95,729 leh hmeichhia 58,712 an ni a; kum hmasa aiin mi 3,158-in an pung. Member tamna ber branch, Mission Veng Branch-ah 1,536 an awm laiin, member tlemna ber Peren Branch (Kohima bial)-ah mi 3 chiah an awm. Member tamna ber bial, Ramhlun North Bialah 2,370 an awm laiin, tlemna ber bial Buarpui Bialah 41 chiah an awm a ni.

Kum 2019 chhung khan KṬP member thi mi 456 an awm a, mipa 386 leh hmeichhia 70 an ni a; mipa thi zat hi 84.65% niin, hmeichhe thi zat chu 15.35% a ni. Mitthi zat hi kum 2018 (mi 471) leh kum 2017 (mi 469) aiin an tlem zawk ve ve. Pastor 207 zinga bial 54-ah KṬP member thi an awm lo.

Kum 2019 chhungin KṬP member nupui/pasal nei 3,537 an awm a, chung zinga 1,584 (43.78%) chu biak-ina innei niin, 1,953 (55.22%) chu hmun danga innei an ni. KṬP chanchinbu, Kristian Ṭhalai lak zat chu copy 43,379 a ni a; branch 879 zinga branch 482-in chanchinbu an chhuah thei.

Kum 2019 chhunga KṬP inkhawm zat chawhrual chu 22.02% a ni. KṬP bial 207-te sum thawh chhuah belhkhawm chu Rs. 3 52,76,755 a ni a, branch 879-te sum thawh chhuah belhkhawm chu Rs. 30,20,34,557 a ni thung.

Bial KṬP hminga missionary châwm zat belhkhawm chu 430 a ni a, branch hrang hrangte chawm zat belhkhawm chu 3,398 a ni. Kum 2019-ah KṬP member missionary-a chhuak thar mi 160 an awm a, KṬP member missionary-a chhuak mek 1,112 an awm.

Nimin tlai dar 3 thleng khan KṬP General Conference-ah lirthei chi hrang hrang 2,236 hmangin palai 15,487 an kal tawh a, vawiina kal tum engemawzat an la awm.