MR zirtirtute thawh hun chhung a tawp dawn

Mizoram sorkarin muster roll (MR)-a a chhawr zirtirtu 800 chuangte thawh hun chhung chu vawiin hian a tawp dawn a, zirtirtute chuan an awm zel dan tur­ah hriattirna an la dawng lo.

MR zirtirtute hi engage­-ment order an peka an thawh hun chhung tur tarlan chu October 14, 2019 aṭanga February 29, 2020 a ni.

February 11, 2020-a Vanglaini palaiin a kawmnaah School Education department hotute chuan MR zirtirtute rawih chhunzawm phalna Department of Personnel and Administrative Reforms (DPAR)-ah an dil mek thu an sawi.

School Education department hotute chuan, MR zirtirtute an thawh chhunzawm leh theihna turin dan angin DPAR-ah dilna thehluh a ngaih thu an sawi a, "DPAR hriatpuina thlapa lâkte chu rawih chhunzawm an rem ti zel," an ti.

School Education department hotute sawi danin, MR zirtirtute chu October 14, 2019 aṭanga February 29, 2020 atana rawih phawt an nih chhan chu - February 2020 thleng bak chu budget thara hlawh pek a ngaih vang a ni. Rawih chhunzawm an nih chuan, dan pangngai angin kum khat chhung atana rawih an ni ang.

Vanglaini palaiin MR zirtirtu a biak pawhte chuan nimin (February 28) thleng khan an hma­lam hun turah sorkar aṭangin hriattirna engmah an la dawn loh thu an sawi.