CSS Hindi Teacher chhawr an nih theihna atan Sorkarin theihtawp a chhuah - Lalchhandama

School Education minister Lalchhandama Ralte chuan Mizoramah CSS Hindi Teacher chhawr an nih leh theihna atan sorkarin theih­tawp a chhuah thu House a hrilh.

Nimin Assembly Session-ah member pali - Nihar Kanti Chakma, Vanlalhlana, Lal­duhoma leh Lalrindika Ralte te zawhna in-ṭawm chhangin Ministry of Human Resource Development (MHRD) in Hindi teacher 665 lak a thuphungin an phalsak thu sawiin Education Minister chuan, "Central lamin Hindi teacher thawktu rawihna tura a thuphunga phalna min pek hi a la chiangkuan tawk loh avangin thawktu lak danah engmah rua­hmanna a la awm lo. Hindi teacher 665 lak theihna atan hian ṭanpuina ni 31.3.2020 thleng a thuphungin central chuan min pe," a ti.

Lalchhandama Ralte chuan CSS Hindi Teacher hnuaia Hindi teacher 1305 rawih 

ṭhinte kha a scheme a tawp tak avangin rawih chhunzawm an nih tawh loh thu sawiin, "Tun­ah hian MHRD hnuaiah Hindi teacher lak theih dan ngaihtuahin sorkarin hma a la mek a ni," a ti a, mi 1305 hi an vaia state sor­kar sum hmanga ruai zui vek loa, test siama mi 500 vel chauh lak tumna a awm leh awm loh zawhna chu a awm loh thuin a chhang.

Lalduhoma chuan tuna sorkarna fawng vuantu MNF-te chuan inthlan campaign laiin CSS Hindi Teacher-te chu rawih chhunzawm turin an tiam nasa hle tih sawiin, "An thu­sawite kha inbumnaah a chang mai dawn em ni?" tiin zawhna a siam a ni.

Chief Minister-in CSS Hindi Teacher-te an maipar thlawn tawp avanga an dinhmun khawngaihin sorkarna an chan hnua Delhi-a a fehthlak hmasakah zirtirtute hi rawih chhunzawm leh turin Prime Minister, Home Minister leh MHRD-te a ngen thu sawiin Lalchhandama chuan, "Keipawhin MHRD-ah theihtawpin ka nawr a, Education minister hlui Pu Thangtea pawhin hma a la. Inthlan hmaa kan sawi ang ngeiin Hindi teacher-te tan hian hma kan la a ni," a ti.

Education Minister chuan Union Home Minister Aizawla a lokal ṭumin Chief Minister-in Hindi teacher chungchang hi a lo sawipui leh tih sawiin, "Union Home Minister a haw hnua lehkha lokal hmasa chu Hindi zirtirtu Mizoramin a mamawh zat zirchianga thawn tura tihna a ni. Zirlai 10 tal awmna sikulah Hindi zirtirtu dah theih a nih thu an rawn sawi a ni," a ti a, lehkha hi department chuan bawhzuiin Hindi zirtirtu mamawh sikul 843 a awm thu MHRD-ah an thawn thu a sawi.

Lalchhandama Ralte sawi danin, MHRD lamin an zirchhian hnuah sikul 635 an pawm a, mahse dan ang thlapin a bak sikul 208 ah pawh Hindi zirtirtu hi dah theih an nih thu thlenin, sikul 843 ah Hindi zirtirtu dah turin Mizoram sorkar chuan a ngen leh a ni. Hemi rual hian Mizoramah chuan trained-in an daih loh avangin trained lo pawh lak phalsak tura ngen tel a ni. Hindi zirtirtu hi lak an nih pawha an service security mumal zawh an neih dan tur pawh sorkar chuan a ngaihtuah a ni.