Lirthei intlan chhawk dan thar MBA-in Court-ah an khing dawn

Mizoram sorkarin lirthei intlan chhawk dan ruahmanna a siam thar chu ukil intelkhawm pawl Mizoram Bar Association (MBA) chuan Gauhati High Court (GHC), Aizawl Bench-ah an khing dawn.

Lirthei intlan chhawk dan thar June 1, 2019 aṭanga hman ṭan tur chu mimal zalenna rahbehnaah an ngaih avangin hman a nih lohna atan MBA chuan High Court-ah hian public interest litigation (PIL) an thehlut dawn a ni. MBA chuan PIL hi June 1 hma ngeia ngaihtuah hman turin thehluh an tum a ni.

Vanglaini palai zawhna chhangin MBA hruaitute chuan ni khata lirthei pahnih zel dintir chu mimal zalenna rahbehnaah an ngaih thu an sawi a, "Tuna intlan chhawk dan hman mek hi chu awm tawk kan ti tho. Lirthei number tawpna indawt neite phei chu ni khatah an lirthei pahnih khalh chhuah theih loh a ni ringawt dawn a ni," an ti.

MBA hruaitute chuan lirthei intlan chhawk tur tih a nih chuan Governor aṭanga peon thlengin intlan chhawk ni se tih chu an ngaihdan a nih thu an sawi a, "Tunah chuan intlan chhawkin a huam loh an siam leh tho si," a ti a, mipuite chu inang khat veka en ṭha an tih thu an sawi.

April 25, 2019 a Coordination Committee on Traffic Management ṭhukhawm chuan lirthei intlan chhawk dan thar hi an siam a, hemi bawhzui hian Traffic SP chuan notification a chhuah a ni. Ruahman dan chuan intlan chhawk dan thar hi June thla chhung en chhin phawt tur a ni.

Intlan chhawk dan tur ruahmanna tharah chuan Thawhṭanniah lirthei number digit tawp ber 1 leh 2 a tawp an tlan thei dawn loa, Thawhlehniah 3 leh 4, Nilainiah 5 leh 6, Ninganiah 7 leh 8 leh Zirtawpniah 9 leh 0 an tlan thei dawn lo. Sorkar chawlh, Inrinni leh Pathianni a huam lo ang.

Tuna intlan chhawk dan hman mekah chuan lirthei number digit tawp ber leh ni zat a in an in tlan phal a ni loa, Pathianni chauh a huam lo thung. Hetihlai hian MBA-te hian an PIL-ah hian Aizawl khawpuia traffic jam chhan an zirchiannaa an thil hmuh chhuah hrang hrangte pawh an tarlang tel dawn a ni.

MBA-te chuan remchang kawng sir awl remchang apianga AMC-in parking an siam vang te, kawng sira workshop te, kawng sira dawrte'n an bungrua an unload chhung a rei ṭhin vang te, street vendor licence pek chhuahna hmunin a zir loh vang te, local council-te'n an huam chhunga AMC phalnaa parking an siam avangte leh thildangte chu traffic jam nasat chhanah an ngai.