Bru lak let dan tur ngaihtuah

Nimin khan Tripura refugee camp-a Bru-te Mizorama lak let an nih dan tur ngaihtuahin Kolasib DC conference hall-ah DC Zoengsanga hoin bru lak let kaihhnawiha din District Level Consultative Committee an ṭhukhawm.

Meeting-ah hian Home Addl. Secretary Lalbiaksangi chuan nikuma sorkarin All NGO-te hnena a lo intiam angin tun ṭuma Bru lak let tum hi a tawpna tur a nih thu sawiin, "Hemi a tan hian tun ṭuma list kan neih te chu 2018 a mi a ni a, mi ṭhenkhat ‘Others’ tih a dah chhungkaw inlaichinna zirchian ngai te pawh an awm a, list ennawn tur leh heng ho endik leh tur hian 2nd Phase Identification chu neih leh phawt a ngai dawn," a ti.

Lalbiaksangi sawi danin, Bru laklet tur te chu inkaihhruaina (guideline) bu in a phut angin an chhuahsan na ngei Assembly Constituency ah dah let tur an ni. Kolasib district Bru ho letna tur khaw VCP te chuan an harsatna tawh dan hrang hrang an tarlang a, kawng awlsam zawk leh felfai zawk tura an ngaihte an thlen a ni.

Bru ho dah na tur khaw 10 zinga khaw panga  Bukvannei, Meidum, Pangbalkawn, North Thinglian leh Saihapui (K) a Bru ho awmna tur hmun chuan forest plantation a khawih buai/ nek chep dawn avangin thuneitu sang zawk hnena thlen a ngaih thu meeting-ah hian tarlan a ni a, Rastali khua a chhungkaw 79 dahna tur hmun ruahman chu mimal ram anga chhal an nih hlawm avangin endik ṭhat leh vek a ngai.

Kolasib district-ah hian Bru lak let tur te hi Dilzauah chhungkaw 55, Saihapui (K) ah chhungkaw 57, N Thinglianah chhungkaw 157, Hortokiah chhungkaw 131, Pangbalkawnah chhungkaw 45, Bairabi (Zophai) ah chhungkaw 54, Bukvanneiah chhungkaw 45, Meidumah chhungkaw 45, South Chhimluangah chhungkaw 154 leh Zodin (Rastali) ah chhungkaw 79 dah tur an ni.