Industrial policy-te thuam ṭhat duh

Mizoram Industry Owners Association (MIOA) chuan nimin khan Aizawl Press Club-ah thuthar thehdarhtute kawmin, Mizoramin industrial policy a neih chhunte changtlung zawkin thuam ṭha se an duh thu an sawi.

MIOA President F Roding-luaia chuan sorkarin industrial police kan neih chhunte changtlung zawka thuam ṭha in, ṭhalai bul ṭan duh tan leh tuna hma la mek te ti phur tura hma an lak sak an beisei thu sawiin, "Hei hian industry lamah kan ramin hma a sawn phah ngei kan ring. Kan vanduai nge kan vannei pawh kan hre lo, kan state-in industrial policy a lo neih ve chhunte chu hun eng emaw aṭang khan sum harsatna avangin a reh ta vang vang mai a ni," a ti.

F Rodingluaia central lam aṭanga hmarchhak state tana hamṭhatna awm ṭhin te a bo ta duak tih sawiin, "Industry department kan hnek hnaih ber DIC lah chu tih bo tumin sorkar lamin hma an la mek bawk si. Hemi chungchang pawh hi kan sorkar thar hian min ngaihtuah ṭhat sak leh ngei kan beisei a ni. Mizo mipuite mahni siam chhuah ngei a tam thei ang ber hlui kan tum," a ti a, Zoram hmasawnna turin Mizo siam ngei lei ṭhin turin Mizo mipuite a sawm.

AMC chu an ṭhahnem-ngaihna an hriatthiampui rualin, Mizorama industry-te dinhmun hre reng chunga an dan siam pawh an her rem theih an beisei tih sawiin MIOA President chuan, "Industries department lam pawh hian ram hauh ringawt, hma la si lote leh industrial area a bikin Industrial Growth Centre, Luangmual/Tuivamit VC pass la tam lutuk te hi hriatthiam har kan tiin, a ṭul anga hma min lak sak turin kan beisei bawk a ni," a ti.

MIOA hruaitute chuan industrial area-a awm an ni chungin tui, eng, inkalpawhna kawng leh power chungchangah harsatna an tawk deuh reng tih sawiin, "Electric bill te hi kan chawi tam bik a, chutih rualin induhsakna a awm leh chuang si lo. State dang kan hmuh leh kan hriat phak chinah chuan industrial area hi chu duhsak bik an ni a, load shedding a awm dawnte hian an hriat lawk tir ṭhin," a ti a, vawi khat current a awm lohin sum tam tak an hloh ṭhin thu an sawi.