Ramhmul damdawi ṭangkaina zirchian a ngai - Health Minister

State Medicinal Plants Board (SMPB) chuan nimin khan Chanmari YMA Hall-ah ‘Training/Awareness cum Buyers/Sellers Meet’ buatsaih a ni a, khuallian Health minister Dr R Lalthangliana chuan kan rama ramhmul damdawite ṭangkaina zirchian a ngaih thu a sawi.

Health Minister chuan Mizoramah ramhmul damdawi hrang hrang 1200 vel awm anga hriat a nih thu sawiin, "Ramhmul damdawi hi an pawimawh leh ṭangkaina zirchiang tura kan beih a ngai. Ram changkang zawkin an damdawi siamna hmunpui (pharmaceutical industry) atana hmanraw hrang hrang an lakkhawm zinga tam tak chu ramngaw aṭanga lak chhuah a ni," a ti.

Mizoramah ramhmul tam tak a awm avangin kan vanneih thu sawiin Dr R Lalthangliana chuan, "Kan ramah hian ramhmul damdawi tam tak awmin, la hmuhchhuah loh pawh awm nual tura ngaih a ni," a ti a, ramhmul damdawite chu kan ram hausakna atan kan hman thiam a ṭul thu a sawi. State Medicinal Plants Board (SMPB) hi National Medicinal Plants Board hnuaiah kum 2001 khan din a ni a, kum 2015 aṭang khan AYUSH-in an enkawl ṭan.