KHAWTHLIR

Graduation Day
Govt. Aizawl College (GAC) chuan nimin khan Synod conference centre-ah an college aṭanga graduate thar mi 295 te pualin Graduation Day an hmang. Govt. Aizawl College-ah hian zirlai 1269 leh zirtirtu 58 an awm mek a ni.

Zirlai lawmpui
Helen Lowry Higher Secondary School chuan nimin khan an sikul aṭanga HSLC leh HSSLC pass tharte lawmpuina hun an buatsaih a, khuallian School Education Minister Lalchhandama Ralte chuan zirlai pass tharte chu zirtirtuten Pathian kaihhruaina nen an enkawl avanga hlawhtlinna chang an nih thu sawiin, an hma lam hun lokal zel turah pawh Pathian hriatna nen theih tawp chhuah turin a chah. Helen Lowry HSS aṭang hian HSLC ah 90% leh HSSLC-ah 83.78% an pass.

IPS transfer sut
Ministry of Home Affairs-in LH Shanliana (IPS), January 11, 2019-a Mizoram aṭanga Delhi-a awm tura transfer order a tih chhuah chu a cancel leh a, Mizorama awm chhunzawm tura tih a ni.

Minister-in enfiah
Sports & Youth Services minister Robert Romawia chuan nimin khan Lunglei khawpui leh a chheh vela an department hmalakna hrang hrangte tlawhin hmalak chhunzawm dan tur a enfiah. Minister hi Lunglei HPC vice chairman Lawmawma Tochhawng leh sports association hruaitute'n an ṭawiawm.

Out post hawng
Chhingchhipa police out post thar chu nimin khan DIG (Northern Range) Lalbiakthanga Khiangte-in a hawng. Out post hawn inkhawm hi Chhingchhip community hall-ah buatsaih a ni a, Serchhip addl. SP PC Lalṭanpuia'n kaihruaiin, DIG chuan out post thar chu Chhingchhip leh a chhehvel khawtlang tana hmasawnna thlentu ni tura a duh thu a sawi. Police out post atan hian VC building a thlawna luah hawh rih a ni.

Secretary in tlawh
Information & Public Relations secretary Sangdingliana chuan Thawhṭanni khan Mamit IPRO pisa a tlawh a, DIPRO Paul Rokima'n office mamawh leh harsatna hrang hrang a lo thlente chu a theih ang anga bawhzui a nih dawn thu a sawi.