Headmaster-te tan intuaitharna hun buatsaih

School Education department bultumin Federation of Mizoram Government School Teachers (FMGST) chuan nimin khan Dawrpui Multipurpose Centre-ah government elementary school-a headmaster-te tan intuaitharna hun ‘One Day Refresher Programme for Elementary School Headmasters’  an buatsaih a, School Education Minister Lalchhandama Ralte-in a hmanpui.

Lalchhandama Ralte chuan Education department-a thawktute chu Mizoram sorkar hnuaia thawktu zawng zawng zinga 30% vel an ni tih sawiin, "Education department hnuaia thawktu zingah kohhran leh khawtlanga a khaipa ṭhahnem tak an awm hi a lawmawm hle, kan department nep lohzia tilangtu a ni," a ti. 

Zirtirtu hna chu hna zahawm a nih thu sawiin Education Minister chuan, "Headmaster-te ngat phei chuan zah an hlawh lehzual a, hei vang hian zirtirtute hi sorkar hna thawk dangte nena bukna khata khai rual theih an nih loh avangin a ṭha zawngin an danglam ngam tur a ni," a ti a, sorkarin zirna ngaih pawimawh ber zingah a neih dawn thu a sawi.

Sorkar sikul hrang hranga enrolment tla hniam leh sorkar sikul sawi khawm leh khar ngai hiala awm ṭhin chu headmaster-ten 'keimah vang a ni' tia a mawhphurhna la ngam a, insiamṭhaa enrolment drive lamah pawh ṭan lak thar a ṭul tih sawiin Education Minister chuan, "Kum 2020-ah phei chuan sikul khar ngai khawpa enrolment nei chhia zirtirtute chu boruak dang hip tir sorkarin a hnial dawn lo," a ti.

Intuaitharna hun hi School Education director Lalzarmawii'n kaihruaiin, School Education Secretary Esther Lalruatkimi'n headmaster-te mawhphurhna hrang hrang a sawi.