Mitinin PMJAY an ban phak theihna atan Sorkarin hma a la mek - Chief Minister

Thawhṭanni khan chief minister Zoram­thanga chuan a bial Aizawl East-I a fang a, health care scheme Pradhan Mantri Jan Arogya Yojana (PMJAY) chu awm­ze nei zawk leh tu tan pawh a awlsam taka ban phak a nih theih nan hma lak mek a nih thu a sawi.

Zoramthanga chuan sorkarin hriselna a ngaih pawimawh thu sawiin, "Tunah hian damlo inenkawlna sorkar hnathawkten medical reimbursement an bill theih ṭhin anga sorkar hnathawk lote pawhin cheng nuai 5 thleng an inenkawlna senso bill theihna tura sorkar laipui scheme thar PMJAY chu kalpui ni tawh mahse hospital zawng zawngah hman a la nih lo. Harsatna awm sukiang tur hian hmalak mek a ni," a ti.

Chief Minister chuan ram hmasawnna tur chuan inkalpawhna kawng ṭha neih a ṭul thu te, kuthnathawktute tan kawngpui aṭanga an lo/huan neihna hmun pan theihna tur link road siam­in awlsamna leh hlawkna nasa tak a thlen theih dante sawiin, "Sorkarin chumi atan chuan hma a la mek zel a ni. Kawng ṭha sorkarin a ngaihtuah rual hian chawa hnianghnar a ngai pawimawh," a ti a, ṭhenawm state-te an lo buai thulh pawha harsatna tawk ve lo tura intodelh a ṭul thu a sawi.

Chief Minister hi PWD chief engineer Bowman-a, Horticulture director Elizabeth Saipari, Agriculture director Rohmingthanga, UDPA director Joseph H Lalramsanga leh Rural Development jt. director Rita Lalnunmawii ten an ṭawiawm.