Rules a taka kalpui dan tur rel

Serchhip Town Sanitation Task Force Committee chu nimin khan addl. DC Chuauhnuna hoin DC pisa-ah an ṭhukhawm a, Solid Waste Management Rules, 2016 a taka an district chhunga kalpui dan tur an rel.

Meeting-ah hian Solid Waste Management Rules, 2016 hnuaia tih hlawhtlin ngai hrang hrang - in tinin an bawlhhlawhte chi thuma thliar hran saa an paih dan tur te, mitinin bawlhhlawh kan lo neih tlem zawk nana hmalakna tur te, thirchhe zawng, lehkha chhe zawng leh hnawm haia eizawng ṭhin te register dan tur te,  World Environment Day, 2019 denchhena plastic bawlhhlawh chharkhawm runpui hnatlang neih dan tur te,Solid Waste Management model khua atana khaw thlante leh hunbi neia thuneitu sang zawka hmalak dan report dan turte an rel a ni.

Solid Waste Management hmalaknaah hian model village neih tura tih a ni a, district headquarter leh khaw dang pathum thlan tur a ni. Hemi atan hian thuneitu sang zawk aṭanga rawn thlan sa Leng khua leh an rawn chhawp chhuah sa khua aṭangin Khawlailung leh Buangpui thlan an ni.