Electric bill tihsan tum duh lo

MPC chuan thuchhuah siamin, April 1, 2020 anga electric bill tihsan tuma hmalakna awm chu ṭha lo an tih takzet thu tarlangin, "Electric bill tihsan tumna hi a rang thei ang bera hnukkir turin thu­neitute kan phut a ni," an ti.

MPC chuan kan ram leh mipuite kaihruai tura kan thlan MLA-te hlawh leh an hamṭhatna a pun thur thur lai a, mipuite phur a rit tulh tulh thung si hian, kan ram hruaituten mipuite hmakhua aia anmahni ṭang hma an ngaih pawimawh zawk zia a tilang chiang hlea an ngaih thu tarlangin MPC chuan, "Kum 30 chuang state puitling kan nih tawh hnuah pawh India rama state intodelh lo berte zinga mi kan la ni fo mai hi a mualphothlak kan ti," an ti a, Mizoram sua­sam tute khengbet tawh turin Zoram mipuite an chah.