Assam Rifles insawn hun tur a la hriat loh Sorkarin MHA-ah report thehluh an tum

Aizawla Assam Rifles-te chu May 31 hmain Zokhawsangah an insawn chhuah hman hmel loh. Mizoram sorkar chuan Assam Rifles-te hi May 31 hmaa an insawn hman loh chuan Ministry of Home Affairs-ah a thlen dawn nia thu dawn a ni.

Ministry of Home Affairs (MHA) chuan February 19, 2019 khan office memorandum ti chhuakin, Aizawla Assam Rifles Battalion headquarters (Lammual leh a chhehvel) chu May 31, 2019 hmaa Zokhawsanga insawn tura tih an nih thu a tarlang. 

MHA tarlan danin, MHA Addl. Secretary (Police) kaihhruaina hnuaia February 7, 2019 meeting thuchhuak angin, Aizawla Assam Rifles-te hi Zokhawsanga insawn tura tih an ni. Thudawn danin, Assam Rifles eng emaw zat chu Zokhawsangah hian hun eng emaw chen awmtir an ni tawh a, an vaia insawn tur chuan kawng, tui leh electric lamah tihfel tur hmabak a la awm. Assam Rifles hotute chuan heng an mamawh hrang hrangte peih fel turin Mizoram sorkarah an thlen a, tihfel a nih hnuah an insawn ang.

Home department hotute, Assam Rifles hotute leh hnathawktu Engineering Projects India Ltd. (ECIL) hotute chuan May 24 khan Zokhawsang hi an tlawh a, a dinhmun an enfiah. ECIL chuan hnathawh zawh hun atan ni 45 tal hun pek belh an dil a, mahse Home department hotute chuan May 31 a ral chuan Ministry of Home Affairs-ah report an theh luh tur thu an sawi thung.

Vanglaini palai zawhna chhangin Home department hotute chuan engtikah nge Assam Rifles-te hi an insawn chhuah dawn an sawi chian theih loh thu a sawi a, "A ṭul angin hma kan la phawt ang a, May 31 hmaa an insawn chhuak lo a nih chuan Ministry of Home Affairs-ah thil awm dan kan thlen dawn a ni," an ti.

Hetihlai hian Assam Rifles hotute chuan an insawn tur chungchangah hian MHA aṭanga phalna an hmu a nih loh chuan thuthar thehdarhtute hmaah engmah an sawi theih loh thu an sawi a ni.