Sorkar hnathawk kher loin eizawnna nghet an neih theihna atan sorkarin hma a la - CM

Aizawl East-I bialtu MLA, chief minister Zoramthanga chuan nimin khan a bial chhung Muthi, Zuangtui leh Ṭhuampui a tlawh a, sorkar hna thawk kher loa eizawnna ngelnghet an neih theihna atan sorkarin hma a lak mek thu a sawi.

A bial chhung mipuite nen an inkawmnaah Chief Minister chuan, "Sorkar hna thawk kher loa eizawnna ngelnghet mipuiin an neih theih nan sorkarin hma a la mek a ni. Chumi atan chuan kawng ṭha siam te, lo leh leilet tui mamawh chawmzo tur siam te, kawphetha atana lui hman ṭangkai te, mau chin a mau leh mau aṭanga thil siamte chu state sum dehchhuahna puia siamte leh a dang dangahte hma lak zel a ni," a ti.

Zoramthanga chuan sorkarin zirna leh hriselna lama hmasawn chu a ngaih pawimawh thu sawiin, zirlaite chu taima taka lehkha zir a, an nu leh pa leh zirtirtute thu awih tur leh ruihtheihthil laka fihlim tlat turin a chah. Chief Minister hi PHE Engineer in Chief Lalmuanzova, P&E engineer in chief C Lianlunga, Commerce & Industries director Hmingthanzuala, Tourism director Biakthanmawia leh UDPA director Joseph Lalramsanga ten an ṭawiawm.