Mizoram sorkarin Synod hnenah Sikulsen leh Sikulpui a hlan let

Mizoram Synod-in a dil ang leh Council of Minister-in an rem tih angin Government Boys' Middle School (Sikulpui) leh Government Boys' Model English Medium Primary School (Sikulsen) leh a ram chu nimin khan Education minister Lalchhandama Ralte pisa-ah Mizoram sorkar chuan Mizoram Synod hnenah an enkawl tur leh a neitu nihna chang zui nghal turin a hlan.

Lalchhandama Ralte chuan 'engkim tan hun ruat a awm' tih a nih angin sorkar leh Mizoram Synod indawrna awmsa-ah sorkar tharah hetiang hlawhtlinna a awm hi lawmawm a tih thu sawiin, "A tira enkawltu mission kuta neitu nihna hlan let a ni hi zirna lama thil ṭha thlentu a nih ngei ka beisei. Zirna lamah Mizoram tana innghahna leh chhen fakawm tak a nih hi Mizoram Synod laka sorkar beiseina a ni," a ti a, hun lokal lehzel tur atan duhsakna a hlan.

Mizoram Synod aiawha thusawitu executive secretary i/c School Education Rev. K Lalrinmawia chuan, "Sorkarin Sikulpui leh Sikulsen leh a ramte a enkawltu hmasa Synod kutah a hlan let hi kan lawm tak zet," a ti. Sikulpui leh Sikulsen leh ram inhlannaah hian Mizoram sorkar aiawhin School Education secretary Esther Lalruatkimin hming a ziak a, Synod aiawhin executive secretary Rev K Lalrinmawia'n hming a ziak a, Education Minister-in hming a ziah hnan.