Goa-a plastic khap a nih dan zirchiang

Mizoram Journalists' Association (MJA) Gen. Hqrs. member pakuate chu nimin khan Goa khawpui, Panaji-a municipal corporation hotute nen an inkâwm a, chumi hnuah Panaji-a bawlhhlawh sawngbawlna leh plastic bag an thehthangna hmunte an tlawh.

MJA member-te hi Panaji khawpuia bawlhhlawh an sawngbawl dan leh plastic bag (polythene) an thehthang dan zir turin Aizawl Municipal Corporation (AMC) chuan a tir a ni. AMC hian kumin August 1 aṭangin Aizawl khawpuiah plastic bag micron 50 aia pan zawng zawng khap a tum a ni.

Corporation of the City of Panaji (CCP) commissioner Shashank Mani Tripathi chuan, Panaji-ah nikum aṭangin micron 50 aia pan plastic hman an khap thu a sawi a, "Dawr lian ho chuan an zawm ṭha viau a, dawr te zingah erawh hmang ru tlem azawng an la awm. Hmang luite chu man an nih chuan Rs. 5,000 thleng chawitir theih an ni a, man nawn chuan an trade license cancel theih a ni," a ti a; dawr zawng zawng, a tenau thlengin CCP license neih vek a ngai a, kum tin renew a ngaih thu a sawi.

Shashank Tripathi chuan micron 50 aia tlem chiah khap a nih chhan sawiin, "Micron 50 aia pan chu hman nawn turin sawngbawl theih a ni lo a, micron 50 aia chhah chu sawngbawl theih a ni," a ti. CCP Commissioner sawi danin, chhungkaw tin aṭangin bawlhhlawh paih man kum khatah Rs. 500 an la a, hotel leh restaurant-te aṭangin a len dan a zirin Rs. 5,000 an la a ni. Bawlhhlawh ṭawih thei te chu báwm hringah an paih a, ṭawih thei lote chu báwm dumah an paih a; ṭawih thei leh ṭawih thei lo thliar loa bawlhhlawh paih lote chu CCP-in a paihsak lo mai ṭhin. Bawlhhlawh paih kaihhnawihah thawktu mi 400 vel an awm.

CCP Commissioner chuan, Panaji khawpuia bawlhhlawhte chu chi hnih - ṭawih thei leh ṭawih thei loah an ṭhen thu sawiin, "A ṭawih thei chite chu nitin zing lamah in tin aṭangin lak khawm a ni a, ṭawih thei lote chu chawlhkar khatah vawi hnih lak khawm ṭhin a ni," a ti a; hotel leh restaurant liante bawlhhlawh bik erawh chu nitin lak khawm a nih thu a sawi.

Bawlhhlawh ṭawih theite chu sawngbawl a ni tih sawiin Shashank Tripathi chuan, "Window composting system hmangin kan sawngbawl a, leiṭha atan siamin, lo neitute lei turin pek a ni," a ti. CCP Commissioner sawi danin, bawlhhlawh plastic lam chi chu chi hrang hrangah ṭhenin an thliar a, hman nawn theihte chu hman nawn turin an sawngbawl a, factory-ahte an mamawh angin an hralh ṭhin. A alh thei ṭhenkhat chu cement factory-ahte an hralh a, damdawi-in bawlhhlawh (bio medical waste)-te chu incinarator-ah an hâl ral ṭhin. Plastic lam chi bawlhhlawh an hralh lehna aṭangin kum khatah cheng nuai 30-40 vel an la lut thei a ni.

Aizawla plastic bag pan chi khap tur chungchangah Shashank Mani Tripathi chuan, "Dan siam mai hi chu harsa lo a, a harsa zawk chu a taka a nihna ang taka kalpui hi a ni. Plastic bag khap tur hian a pawimawh hmasa chu, a thlakna tur mipuite kawhhmuh a ni," a ti a; mipui zirtir leh hmin hmasak a ngaih thu te, mipuiin an tuipui ve a ngaih thute a sawi bawk. MJA member-te hian CCP Commissioner hnenah hian khiangkawi ipte leh tawlhloh puan (scarf) an hlan a; CCP mite'n bawlhhlawh paihna leh sawngbawlna hmunte an fanpui a ni.