KHAWTHLIR
Health care sawiho
Mizoram State Health Care Society Governing Body chu Thawhlehni khan an chairman, chief minister Zoramthanga hoin Cabinet meeting room-ah an ṭhukhawm a, Health Care Society inrelbawl dan leh Health Care Scheme-a hmalak dan tur an sawiho. Meeting-ah hian Co-Chairman Health minister Dr R Lalthangliana, dy. speaker R Lalrinawma leh MLA Dr ZR Thiamsanga te pawh an tel.
Thisen pe
Boston Higher Secondary School, Mission Veng, Aizawl chuan an sikul din champha vawi 11-na pualin nimin khan blood donation camp an huaihawt a, Aizawl Civil Hospital tan thisen unit 58 an pe a, a petute hi mipa 46 leh hmeichhia 12 an ni.
Loneitute zirtir
Nimin khan ni hnih awh tur loneitute hnenah an thlai chin te enkawl dan leh a kalphung te inzirtirna hun IPR Auditorium Hall-ah neih a ni a, DAO George Lalthan-ngura chuan a hawng. Loneitute hi thlai hrisel an neih theihna tura a bul ṭhut pawimawh te, thlai hrisel lo a lo awm chhan te, thlai tichhe ṭhintu a hrik leh rannung chi hrang hrang chungchangte leh thlai a hrisel theihna atana thil pawimawh hrang hrangte an zirtir.
Sirva tlangzarh
Mizoram ENVIS Hub (Mizoram Pollution Control Board) leh Association for Environmental Preservation (ASEP) buatsaih Sirva (Birds Catalogue) volume-I lehkhabu chu nimin khan Environment, Forests & Climate Change minister TJ Lalnuntluanga’n a pisa-ah a tlângzarh.
Minister-in tlawh
Food Civil Supply & Consumer Affairs (FCSCA) minister K Lalrinliana chuan nimin khan Hunthar Venga Legal Metrology office a tlawh a, thawktute nen an inkawm a, officer mamawh belh a nih dan leh staff indaih lohna phuhru tura sorkar hmalakna hrang hrangte thlirho a ni. K lalrinliana chuan building sakna atana hman tur balu quality hriat a nih theihna atana hma lak a ṭul thu a sawi. Minister hi FCSCA secretary HL Rochungnunga’n a ṭawiawm.