Loneitute'n sorkar aṭanga ṭanpuina an dawn Dik taka an hman a ṭul - R Lalzirliana

Mizoram Rubber Planters Association (MIRPA) chuan nimin khan Land Resource, Soil and Water Conservation (LRSWC) department confe­rence hall-ah khawmpui an hmang a, khuallian LRSWC minister R Lalzirliana chuan loneitute'n sorkar aṭanga ṭan­puina an dawnte dik taka an hman a ṭul thu a sawi.

R Lalzirliana chuan Mizo mipui tam zawk innghahna chu lo neiha eizawn, leilunga innghat a nih avangin sorkar pawhin a ngai pawimawh tih sawiin, "Sorkarin loneitute din chhuahna tur atan ruahmanna ṭha tak tak a siam ṭhin. Heng sum leh pai, loneitute ṭanpui nana sorkarin a dah hi a hmangtuten a nihna tur dik taka an hman a ṭul a ni," a ti. 

Mipui kan pung a, khuain lo atana ram a mamawh a zau zel tih sawiin R Lalzirliana chuan, "Kum tam lêng hman lo ramte loh theih loha ṭheh a ngai ta hian nasa takin buh leh bal tharchhuah a nghawng a, sum leh pai dinhmun thlengin a tlak hniam phah a ni," a ti a, SEDP hmangin sorkarin loneitute chawi­kanna tur ruahmanna a siam leh dawn thu a sawi.

LRSWC Minister rubber chu suma a chan theih hun chu a phun tirh aṭanga kum sarih ngah ngai a nih thu sawiin, "Nghah chhung rei deuh mah se, a puitlin tak tak hnuah erawh hahdam taka sum lakluhna hnar ṭha tak a ni. Rubber chingtute hman ṭangkai tur hmanraw pawimawh, a tihrona khawl te pawh ngaihtuaha hmalak mek a ni," a ti.

Rubber and Allied Crops Development Committee vice chairman Lalrinsanga Ralte, MLA chuan eng kawngah pawh hlawhtling tak tak tur chuan taimak, teirei peih, ṭhahnemngaih leh tumruh a ngaih thu sawiin, "Hlawhtlinna tlanga ding tawhten an paltlang thil harsa hmuh pui si loa hlawk nghal tuma bul ṭan a fuh lo," a ti a, sorkar aṭanga ṭanpuina dawn ringawt beisei chuan a hlawhtlin theih loh thu a sawi.

MIRPA khawmpui hi an president Vanlawma Chhangte in kaihruaiin, general secretary Francis Lianmawia sawi danin, Mizoram pumah rubber kung nuai sawm chuang a awm a, chhungkaw sang khat chuangin rubber an ching. Kuminah chhungkaw 300 in rubber kung nuai khat sing sarih vel an hnai thei dawn a ni.