Bru lak let dan tur sawiho

Tripura refugee camp-a Bru-te lak let dan tur ngaihtuahin nimin khan Mamit DC Dr Lalrozama hoin DC conference hall-ah meeting neih a ni a, Home department official-te'n an tel pui.

Dr Lalrozama chuan Bru lak let chu Mizoram sorkar issue lian tak anih angin la let tura ruahmanna siam leh a nih thu sawiin, "Kan district hi lak let tur chhungkaw ngah ber kan nih avangin a bupui ber kan ni dawn. Sorkar official hrang hrangte pawhin kan mawhphurhna ṭheuhte uluk leh ṭhahnem ngai taka kan hlenchhuah a ṭul dawn," a ti a, an district chhunga Village Council leh tlawmngai pawlte chu thawhpuiah a sawm.

Home addl. secretary Lalbiaksangi chuan nikuma sorkar leh All NGO-te'n inremna an siam tawh angin Bru-te hi kumin October aṭang hian lak let hna thawh tum a nih thu a sawi a, "Boruak muanawm hnuaiah a let tur dik takte lak let an nih theih nana tihtur ṭul hrang hrangte leh department hrang hrang te'n a kan mawhphurhna leh senso ngai tur zatte sawikhawma ruahmanna siam chu kan in kohkhawm chhan a ni," a ti.

Meeting-ah hian laklet hnathawhna tura identification kalpui tawh atangin ruahmanna hrang hrangte thlirho a ni.  Mizoram sorkarin Bru lak let hna a thawh ṭan tirh aṭanga Mizoram khua leh tui dik tak rawn lette hnenah central sorkarin ṭanpuina financial assistance (chhungkaw pakhat in sa lo tih loh) pek kim vek an nih tawh thu tarlan a ni.

Bru lak let hna kalpui leh turah hian Mamit district-a lak let tur chu chhungkaw 4185 an ni a, khaw hrang hranga awm tur an ni.