Police leh YMA ṭangkawpin ILP nei lo mi 135 an man

Mizoram Police, Kawrthah Sub-Division leh a huam chhunga YMA Group pahnih Tai­tesena Group leh Lang­kaih Group OB-te'n May 10, 2019 a YMA kum­puan ‘Ram leh hnam humhalh’ chungchanga hmalak dan tur an lo rel tawh bawhzuiin  May 28, Thawhlehni khan hnam­dang Inner Line Permit (ILP) nei lo zawn chhuah leh ruihhlo dap beihpui an thlaka ILP nei lo hnam­dang mi 135 an man.

Police leh YMA ṭang­kawp hian Kawrthah Sub-Division huam chhunga khaw pakua - Darlak, Tui­dam, Kawrthah, Rengdil, Zamuang, Zawlnuam, Bungṭhuam, Luimawi leh Kanhmun khua-ah te hian ILP nei lo hnamdang 135 dapchhuaha an man a ni. Hnamdangte hi first class magistrate Lalmawizuala chuan Kawrthahah Camp Court a neih chilh hnuah thawnkir an ni.

Ruihhlo an dap naah heroin hawng 24 leh bagha cap 320 an man a, hei hi tualchhung rate-ah chuan Rs. 12,40,000 man hu a ni. Ruihhlo kaihhnawihah hian mi 10 man an ni a, thubuai pali ziah luh a ni. Zu pawh rakzu fun 244 leh sap zu um 911 an man a, a kaihhnawihah mi pakua manin, thubuai pali an ziak lut.