Congress nena kan thawhhona Lok Sabha inthlan zawhah a zo - ZPM

Zoram Peoples' Movement (ZPM) hruaitute chuan nimin khan Aizawl Press Club-ah thuthar thehdarhtute an kawm a, Lok Sabha MP inthlan zawh khan Congress party nena an thawhhona a zawh nghal thu an sawi a, ZPM ring ngam chhunzawm turin mipuite an ngen.

ZPM chairman Lalliansawta chuan BJP hotu lawkten MP inthlan campaign-na atan Citizenship (Amendment) Bill, 2016 thar thawh leh India ram puma Uniform Civil Code hmante hmatheh bera an neih tak avangin India ramah Kristian sakhaw lungphum a nghin thu sawiin, "A ep ngam tur bera kan beisei, kan rama kan sorkar thar lah chu Kristiante thlamuan tur zawnga au chhuak loin, BJP/NDA an thlawp tur thu an sawi a ni," a ti.

Lalliansawta chuan kan ram leh hnam dinhmun thlirin Mizorama eptu party zawng zawngte ṭangrual mai tura ngenna an dawn nasat thu sawiin, "Hun tepter tak taka ṭanrualna dawhkan kan buatsaih danah duhthusam lo tam tak a awm kha pawi kan ti a, thawhhonaa tel duh, tel remchang ta lote pawh an awm niin kan hria a, pawi kan ti tak zet a ni," a ti a, party symbol dah ṭhaa common symbol hman kha Congress Party-ten rem an lo tih avang leh, common candidate pawm tlan theih an neih avangin an thawhho tak thu a sawi.

Congress party chu pawl ngelnghet tawh, phuisui sa an nih avangin sum thlengin rinrawlah an neih thu sawiin ZPM Chairman chuan, "Keini pawl hian tih tak zetin an lakah lawmthu kan sawi a ni. Kan thawhhonaah khan ziakin thuthlung engmah siam a ni hran lo a, 'kan candidate inṭawm kha kan thlan tlin chuan NDA lo lamah a thu ang' tih a ni mai. Chuvangin vote kan thlak zawh rual khan kan thawhhona chu a zo leh mai a, a hnu zelah bawhzuiho tur pawh a awm lo," a ti. 

Lalliansawta chuan Lok Sabha MP leh Aizawl West-I by-election neih zawh takah mi zawng zawng chungah tih takzetin lawmthu an sawi tih tarlangin, "Candidate atana lo pen chhuakte Lalnghinglova Hmar leh Lalbuanga Sailo kan ngaihluin, kan ngaisang hle," a ti a, state-ah sorkar thar chak tak a piang hlim hlawl lai, state sorkar siamtu party lehthal chu thil theih loh ang hiala lang ni mah se, ram leh hnam leh sakhua humhalh tura huaisen taka an lo pen chhuak kha ropui an tih thu a sawi.

ZPM mala MP chuh tura duhtu, mi ṭhahnem tak rilru na tak tak an awm tih an hriat thu sawiin ZPM Chairman chuan, "ZPM chunga beiseina sang tak neitute rilru kan tihliam hi pawi kan ti tak zet a ni. An duh ang kan zawm thei lo chung pawha khaw dang hawi chuang loa vote an thlak tih kan hriatin an chungah ZPM chuan lawmthu kan sawi mawlh mawlh a, ZPM laka an beiseina tihlawhtling tur hian tun aṭangin theih tawp chhuah kan tum tih min lo hriatsak tur leh, min ring ngam chhunzawm turin kan ngen a ni," a ti.

Lalliansawta chuan ZPM-in party-ah leh sorkar siam hunah pawh vengtu zahawm tak Val Upa Council a nei tih sawiin, "Val Upate kaihhruaina hnuaiah hian inthurual tlanga relhona a vawng tlat dawn. Eng level-ah pawh Val Upa Council-in thutlukna a siam chu thutawp a ni ang tih hi ZPM chuan Dan puiah a dah hial a ni," a ti a, Congress leh MNF-te'n sorkarna an siam chhungin khawvelin hmasawnna tehfung a neihahte pakhatah mah an hlawhtlin loh thu a sawi.

Zawhna chhangin ZPM sr. vice chairman Kenneth Chawngliana chuan ZPM pawl hrang hrangte chu an ṭanghoa, inchhunfin an tum thu a sawi a, "Tun thlaah hian inchhunfin hman kan tum a, kan zo hman lo. July-ah chuan ZPM angin kan function ang a, constitution tur pawh kan nei vek tawh. Constitution angin hruaitu tur pawh thlan tur a ni," a ti.