Jeremy-a leh Remsiami hnenah Incentive cash award hlan a ni

Sports & Youth Services department chuan nimin khan Chanmari YMA Hall-ah infiamna lama an hlawhtlin avangin Lalremsiami (hockey) leh Jeremy Lalrinnunga (weightlifting) hnenah incentive cash award an hlan a, Sports minister Robert Romawia Royte-in a hman pui.

Robert Romawia chuan Jeremy Lalrinnunga leh Lalremsiamite hlawhtlinna a lawmpui thu sawiin, "Mizoram leh India ram khawvel hriata infiamna lama min pholangtu kan infiammite pahnih ka ngai sang hle. Sorkar thara Sports Minister ka nih veleh an puala incentive cash award chin fel ka tum chu March 13, 2019 khan department hotute nen tihfel a ni," a ti.

Mizoramin infiamna lama hma kan sawn zel theih nan Sports Policy nei turin chak taka hma lak mek a nih thu sawiin Sports Minister chuan, "Tun aṭanga hun rei loteah chuan mumal leh felfai zawkin Sports Policy hnuaiah Sports & Youth Services department chuan hma a la thei dawn," a ti a, Mizo ṭhalaite chu tun aia uar zawka infiamna lama ke pen turin a sawm.

Govt. Complex rawlthar Jeremy hian 2018 Summer Youth Olympics-ah gold medal a lak avangin nuai 15 pek a ni. Hockey khel thiam Siami hnenah nuai 20 hlan a ni thung. Kolasib tleirawl hian Asian Games 2018-ah India silver a lakpui avangin nuai 10 pek a ni a, nuai 10 dang hi Summer Youth Olympics-a pahnihna an nih vang a ni. Anmahni an awm loh avangin pawisa hi an chhungte hnenah hlan a ni.

Tourism department chuan Jeremy Lalrinnunga hi brand ambassador turin kum khat atan contract a ziahpui a, Tourism minister Robert Romawia Royte hian contract amount Rs. 3,00,000 chu a hlan nghal.