School calendar tihdanglam a ni dawn - Education Minister

Nimin khan Serchhip DIET multipurpose hall, Serchhipah Education Campaign buatsaih a ni a, khuallian Education minister Lalchhandama Ralte chuan school calen-dar tihdanglam a nih tur thu a sawi.

Education Minister chuan, kum 2015 aṭanga hman ṭan Continuous and Comprehensive Evaluation (CCE) chu sorkarin ennawn a tiam ang ngeia ennawn a nih thu sawiin, "Exam kalphung pangngaia let leh a school calender pawh tihdanglam a ni dawn. Kan rama zirnain hniam lam a pan chhan ni a lang pakhat zirtirtu indaih lohna pawh hnawh khat turin sorkarin hma a la mek a ni. Zirnain hma a sawn lehzualna atan tun hma lama kalpui ṭhin tawh school inspection pawh kalpui thar a ni ang," a ti.

Lalchhandama Ralte chuan sorkarin Education department a ngai pawi-mawh hle tih sawiin, "Zirna lama hma kan sawn zel theih nan budget pawh dah tam a ni.  Kan rama zirna-inahte sorkar sikul aia mimal leh kohhran enkawla zirlai an tam zawk tlat mai leh result pawh an nei ṭha zawk fo ṭhin hi ngaihtuah chian a ṭul hle. Sorkar sikula zirtirtuten kan puanven te sawi chhing a kan intuaithar a ṭul a ni," a ti a, hun vawng dik tur leh zirlaite tan an thiamna leh theihna hmang chhuak thar leh turin zirtirtute a chah.

Sorkarin zirtirtu ṭha tak a lak sak a, a thlawna zirlaibu, uniform leh chaw chhun a pe chung pawha Mizoram puma zirlai 60% ten private school an la thlang zawk tlat chu zirtirtute in enfiahna tur a nih thu sawiin Education Minister chuan, "Zirtirtute lakah sorkar thikthu a chhe dawn a, theihtawp chhuah ang che chu. Zirlai piah lamah zirlai naupangte Mizo hnam nunphung, tlawmngaihna, aia upa zahnate zirtir tel ṭhin a pawimawh," a ti.

Lalchhandama Ralte hi DIET, Serchhipin lehkhabu an buatsaih 'Science Thumal Hrilhfiahna' tih chu a tlangzarh nghal a ni. Education Campaign hi Education secretary Esther Lalruatkimi'n a kaihruai a, Serlui bialtu MLA Lalrinsanga Ralte pawhin thu a sawi. Campaign-ah hian Serchhip khawpui chhunga sorkar enkawl sikul - primary  aṭanga higher secondary school zirtirtu te, Federation Mizoram Government School Teacher’s (FMGST) hruaitute leh Serchhip DIET a thawktute an tel.