KHAWTHLIR

Thisen pe
Tuikual North Branch KṬP chuan nimin khan an kohhran hall-ah blood donation camp an huaihawt a, Aizawl Civil Hospital Blood Bank tan thisen unit 29 an pe a, a petute mipa 28 leh hmeichhia pakhat an ni.

Minister-in tlangzarh
Nimin khan NCC office, Khatla-ah Sports & Youth Services (SYS) minister Robert Romawia Royte-in a tlangzarh. SYS Minister chuan, "Thlawhtheihna khalh zir lama hmanraw ṭangkai leh pawimawh tak flight simulator hman theih turin hawn a lo ni ta hi a lawmawm hle," a ti a, cockpit leh computer hmanga a taka thlawhtheihna khalh zirna khawl hi ṭangkai taka hmang turin NCC leh ṭhalaite a chah.

Zirlaite zirtir
Road Safety Week, 2019 pualin nimin khan Govt Mamit High School leh Higher Secondary School-ah zirlaite lirthei leh a kaihhnawiha fimkhur tura zirtir an ni. Zirlaite chu kum tling loa lirthei khalh chu dah kalh a nih thu te, sikul banah kawngpuia kal fimkhur a ṭul thute leh lirthei kaihhnawiha hriat tur pawimawh hrang hrangte hrilh hriat an ni.

HoD-te kawm
Agriculture minister C Lalrinsanga chuan nimin khan Convention Centre, Lungleiah Lunglei khawpui chhunga head of department (HoD) te kawm a, Lunglei district-in kawng hrang hranga hma a sawn theihna atan HoD te nena thawhona 
ṭha leh inhmelhriatna ṭha neih a ngaih thu a sawi.'

MLA-te'n enfiah
Assembly Commi-ttee on Estimate chuan nimin khan Bethlehem Vengthlanga SIPMIU hnuaia Sewage Treatment Plant sak mek an tlawh a, a dinhmun an enfiah. Treatment Plant enfiahnaah hian Estimate Committee-te hi an chairman Dr K Pachhunga hoin member-te chu C Lalmuanpuia, Dr Vanlalthlana leh H Lalzirlianate an kal.

Beat post hawng
Aizawl khawpui chhung hmun hniha police beat post siam thar Bethlehem Vengthlang leh Salem Veng a mi chu Nilaini tlai khan IGP LH Shanliana’n a hawng. Bethlehem Vengthlang beat post hi mobile phone number 7085594978 leh Salem Veng beat post hi mobile phone number 7085594969 ah biak pawh theih a ni.