MZU-in endiknaah hma a sawn

Mizoram University (MZU) chuan, National Assessment and Accredi-tation Council (NAAC) zirna in ṭha leh ṭha lo tehna vawi hnihna, second cycle assessment May 13-15 chhung khan a hmachhawn a, tun hnai khan result tih chhuah a ni a, MZU hian endik hmasak aiin hma a sawn.

NAAC hi University Grants Commission enkawlna hnuaia awm a ni a, India ram chhunga zirna in sang ṭhatna leh ṭhat lohna (quality) endiktu a ni a, vawi khat a endik hi kum nga chhung atan a ni. MZU hi professor AKD Dwivedi kaihhruaina hnuaiah university hrang hrang paruka professor-te'n an endik a, Grade A-ah point 3.16 an hmu a ni.

NAAC hian MZU hi kum 2014 khan a ṭum khatna atan an endik a, hemi ṭum hian Grade A tho hmuin point a hmuh zat chu 3.12 a ni a, kumin hian hma a sawn a ni. India hmarchhak university zingah MZU aia point hmu sang zawk te chu - NEHU (3.20) leh Tezpur University (3.25) te an ni. 

Tun dinhmunah MZU-ah hian department 33 leh centre 5 vel a awm mek a, 2019-2020 academic session aṭang hian department thar pali an neih belh leh dawn a ni. Department hawn thar tur palite chu M.Sc (Clinical Psychology), M.Sc (Industrial Chemistry), M.Sc (Food Technology) leh MBA (Tourism & Travel Management) te an ni.