PAHOSS hnuaia hmalakna thlirho

Aizawla traffic jam tihziaawmna atana ruahman Parking House Support Scheme (PAHOSS) chungchang ngaihtuahin nimin khan chief minister Zoramthanga hoin  Parking House Committee for PAHOSS an ṭhukhawm a, he scheme hnuaia hmalaknate an thlirho.

Chief Minister chuan parking house chu in neitute tan sum lakluhna hlawk tak a nih tur thu sawiin, "An ram sorkarin a neih sak tihna a ni loa, vantlang tan ṭangkaia siam turin sorkar puihna nena hmalak a ni," a ti. PAHOSS-ah hian miin in dinglai emaw hmun ruak remchang, parking house sakna tur atana hman theih an neih chuan vantlang motor park na hmun atan sorkarah an dil thei a, motor park-na fee hi in neituten a vaiin an chang zel ang .

A tlem berah parking house pakhatah hian LMV panga emaw two wheeler 30 tal a leng tur a ni. Sorkar aṭangin motor pakhat (LMV) ah emaw 2-wheeler paruk zelah ṭanpuina cheng nuai khat in neitute'n an dawng dawn a ni. PAHOSS hnuaiah hian a thawh khatna atan dilna 46 chu pawm a ni a, Aizawl chhim, hmar, thlang leh chhakahte a vaiin heng parking house vang hian lirthei 1036 park-na hmun a awm dawn a ni.